सहिद स्मारक ए डिभिजन लिगमा सातदोबाटो युथ क्लब पराजित भएको छ।
पाँचौ चरणसम्म शीर्ष स्थानमा रहेको सातदोबाटोलाई छैटौं चरणको खेलमा जावलाखेल युथ क्लबले २-१ गोलले पराजित गर्यो।
सातदोबाटोलाई पराजित गरर्सँगै जावलाखेल भने शीर्ष स्थानमा उक्लिएको छ।
शीर्ष स्थानमा पुग्ने क्रममा जावलाखेलका लागि मंगलबार फोडे फोफनाले ४३ मिनेटमा पेनाल्टी र साइनोस मसोआबीले ५० मिनेटमा गोल गरे।
सातदोबाटोका लागि दीपकसिंह ठकुरीले ७५ मिनेटमा गोल फर्काए। जितसँगै जावलाखेल ६ खेलबाट १३ अंक जोड्दै शीर्ष स्थानमा उक्लिएको छ। सातदोबाटो भने १२ अंकसहित तेस्रो स्थानमा झरेको छ।
यता चर्च ब्वाइज युनाइटेडलाई न्युरोड टिम एनआरटीले २-२ गोलको बराबरीमा रोकेको छ।
खेलको २० मिनेटमा आसिष चौधरी र ६२ मिनेटमा अनन्त तामाङले गोल गरेपछि चर्च ब्वाइजले २-० गोलको अग्रता लिएको थियो।
तर एनआरटीका लागि रोहन खड्गीले ७१ मिनेट र सरोज तामाङले दोस्रो हाफको इन्जुरी टाइमको चौथो मिनेटमा गोल गर्दै आफ्नो टिमको हार टारे।
बराबरीपछि पनि चर्च ब्वाइज दोस्रो स्थानमा उक्लिएको छ। उसको ६ खेलबाट १२ अंक भएको छ। एनआरटी भने ३ अंकसहित पुछारबाट दोस्रो १३औं स्थानमा छ।
