इंग्लिस प्रिमियर लिग फुटबल अन्तर्गत गए राति भएको खेलमा वेष्ट ह्याम विजयी भएको छ।
घरेलु मैदानमा वेष्ट ह्यामले हडर्सफिल्डलाई २–० ले पराजित गर्यो । पहिलो जित दिलाउन वेष्ट ह्यामका लागि पेट्रो ओबियाङ र आन्ड्रे आयुले गोल गरे । यही सिजन प्रिमियर लिगमा बढुवा भएको हडर्सफिल्डका लागि भने यो पहिलो हार हो।
खेलको पहिलो हाफ गोलरहित बराबरी भएपनि दोस्रो हाफको अन्तिम २० मिनेटमा वेष्ट ह्यामले दुई गोल गर्यो । ७२ औं मिनेटमा ओबियाङको गोलमा अग्रता लिएको वेष्ट ह्यामका लागि त्यसको पाँच मिनेटपछि आयुले गोल थपे । पहिलो जितपछि वेष्ट ह्यामले तीन अंक जोडेको छ । हडर्सफिल्ड सात अंकसहित छैटौं स्थानमा छ ।
