खोकना साइक्लिङ उत्साह

दुई साइक्लिष्ट सम्मानित

नारायण महर्जन

काठमाडौं, साउन २६

‘राइड काष्ठमण्डप टू खोकना’ चौंथो संस्करणसम्म आइपुग्दा साइक्लिष्टको उत्साह बढ्दै गएको छ। शनिबार राजधानीमा आयोजित साइकल यात्रा समापनमा एउटा नयाँ शुभकार्य गरिएको छ–प्रख्यात साइक्लिष्टलाई नगद सहित सम्मान गरेर।

आयोजक कन्सेप्ट नेपाल र खोकना पुननिर्माण तथा पुनर्स्थापना समितिले भेट्रान साइक्लिष्ट सोनाम गुरूङ र विश्व साइकलयात्री पुष्कर शाहलाई सम्मान गरेका हुन्।

उनीहरुलाई ललितपुर महानगरपालिका वडा नं २१ का वडाध्यक्ष रविन्द्र महर्जनले सम्मानपत्र र नगद प्रदान गरेका थिए।

दुबैलाई प्रमाणपत्रसहित जनही ११ हजार १ सय ११ रुपैयाँ दिइयो। साइक्लिङमार्फत नेपालको साहसिक पर्यटन प्रवर्धनमा अनरवत योगदान पुर्‍याएस्वरुप गुरूङलाई र नेपाली युवालाई साइक्लिङमा प्रेरित गरेकामा शाहलाई पुरस्कृत गरिएको आयोजक कन्सेप्ट नेपालका संयोजक पवन शाक्यले बताए।

त्यसअघि काठमाडौंको काष्ठमण्डपबाट सुरु भएको साइकल यात्रा बल्खु, चाल्नाखेल, बुङमती हुँदै खोकना पुगेको थियो। २० किमि लामो यात्रामा दुई सय जना साइक्लिष्ट सहभागी थिए।

साइकल यात्राको शुभारम्भ नाटोका महासचिव अमरबहादुर शाहीले गरेका थिए। उक्त अवसरमा शाहीले यस्ता कार्यक्रम पर्यटन प्रवद्र्धनमा कोशेढुंगा हुने बताए ।

खोकनामा स्थानीय सिकाली व्याण्डले लोक धुन पस्केर मनोरञ्जन दिलाएको थियो भने गाउँलेले साइक्लिष्टलाई नेवार भोज खुवाएका थिए ।

राइड काष्ठमण्डप टु खोकनाको प्राविधिक टोलीमा प्रख्यात साइक्लिष्टहरु रञ्जन राजभण्डारी, देवेन्द्र बस्न्यात, सुदिप पौडेल, गोपाल श्रेष्ठलगायत छन्। त्यसैगरी यसको प्रवर्धकमा नेपाल पर्यटन बोर्ड छ भने सहयोगीहरुमा नेपाल माउन्टेन बाइक टुर्स, रैका टुर्स एण्ड ट्रेक्स, हिमालयन म्याप हाउस लगायत छन् ।

आगामी संस्करणदेखि अझै परिमार्जित र भब्य रुपमा ‘राइड काष्ठमण्डप टु खोकना’ आयोजना गरिने समितिका अध्यक्ष श्याम महर्जनले जानकारी दिएका छन् ।