तस्वीरमा हेर्नुहोस् सवारी साधनको बृहत मेला

नारायण महर्जन

काठमाडौं, भदौ १३

राजधानीको भृकुटीमण्डलमा सवारी साधनको बृहत मेला सुरु भएको छ। १८ गतेसम्म संचालन हुने यो १२ औं नाडा अटो मेला हो।

अटोसम्बन्धी पछिल्लो प्रविधिसमेत एकैथलोमा अवलोकन गर्न सकिने गरी नाडा अटोमोबाईल्स एशोसिएसन अफ नेपालले मेलाको आयोजना गरेको हो। नेपाली बजारमा भित्रिएका विश्वका सबै ब्रान्डका सवारी साधन अवलोकन गर्न सकिने व्यवस्था मिलाइएको आयोजक समितिका सदस्य अनुप बरालले जानकारी दिए। उनले मेलामा सवारी साधनको पछिल्लो प्रविधिको बारेमा पनि जानकारी लिने व्यवस्था गरिएको उल्लेख गरे।

मेलाको उद्घाटन गर्दै भौतिक पूर्वाधार तथा यातायात मन्त्री वीरबहादुर बलायरले सवारी साधनहरुको व्यवस्थापनमा निजी क्षेत्रको सहयोगको आवश्कतामा जोड दिए। उनले निजी क्षेत्र सवारी साधनको व्यवस्थापनको मामलामा स्वार्थी बन्न गएको आरोप पनि लगाए।

साना, ठूला गरी ९१ वटा कम्पनीहरु सहभागी भएको मेलामा १ सय ३० वटा स्टल राखिएका छन्। मेलामा चार पाँग्रे गाडीहरु, मोटरसाइकल तथा स्कुटर, तिनका पार्टपूर्जा, लुब्रिकेन्टस लगायतका स्टलहरु छन्। मेलामा खरिदकर्ताहरुलाई विभिन्न छुट र उपहारको घोषणा गर्न कम्पनीहरुबीच होडबाजी देखिन्छ।

विभिन्न कम्पनीहरुले मेलामार्फत आफ्ना गाडी खरिदमा नगद १ लाखदेखि ६ लाखसम्मको छुट, स्क्र्याच कुपनमार्फत विभिन्न उपहार, निशुल्क सर्भिसिङ तथा बिमा सुविधाजस्ता आकर्षक अफरहरु घोषणा गरेका छन्। त्यस्तै मोटरसाइकल तथा स्कुटर खरिदमा पनि नगद ७ हजारसम्मका छुट तथा स्क्र्याच कुपनमार्फत विभिन्न उपहारको घोषणा गरेका छन्।

अन्य समयमा भन्दा यो बेला विशेष छुट पाइने भएकाले सर्वसाधारणको मेलामा आकर्षण बढेको देखिन्छ। त्यस्तै सबै ब्राण्डका गाडीहरुको एकै ठाउँबाट चाहेजति जानकारी पाइने भएकाले मूल्याङ्कन गरेर खरिद गर्नका लागि यो मेला विशेष अवसर भएको आयोजकको भनाइ छ। चाडपर्व नजिकिँदै गर्दा विशेष छुट समेत पाइने भएकाले गाडीका अफरहरु बुझ्न मेला अवलोकन गर्न आएको सर्वसाधारण बताउँछन्।

पछिल्लो समय राष्ट्र बैंकले मौद्रिक नीतिमार्फत गाडी खरिदमा कुल मूल्याङ्कनको ६५ प्रतिशतसम्म बैंकहरुले कर्जा प्रवाह गर्न पाउने व्यवस्था गरेको छ। गाडीको मूल्यमा ३५ प्रतिशत रकम भुक्तानी गरेपछि बाँकी रकम किस्ताबन्दीमा बुझाउन सकिनेछ।