नेपाल राष्ट्र बैंकले ल्याएको मौद्रिक नीतिको बैंकहरुले स्वागत गरेको छन्। कोभिड १९को आर्थिक क्षेत्रमा परेको असर न्यूनीकरण गर्नेगरी नीति आएको भन्दै बैंकहरुले नीतिप्रति सकारात्मक जनाएका हुन्।
नेपाल बैंकर्स एसोसिएसनका अध्यक्ष तथा सानिमा बैंकका सिइओ भुवनकुमार दाहालले बैंकिङ कसुरसम्वन्धी व्यवस्थालाई संशोधन गर्ने व्यवस्था राम्रो रहेको प्रतिक्रिया दिए।
‘हालको कसुरबाट निर्दोष व्यक्ति पनि जेल जानुपर्ने अवस्था रहेकोमा यसलाई संशोधन गर्ने कुरा राम्रो छ’ उनले भने।
समग्रमा कोभिड– १९ को असर न्यूनीकरणमा मौद्रिक नीति केन्द्रित देखिएको उनले बताए। मौद्रिक नीतिका बुँदामा एसोसिएसनको बैठकमै छलफल गरी आधिकारिक धारणा सार्वजनिक गर्ने उनले बताए।
त्यस्तै नविल बैंकका प्रमुख कार्यकारी अधिकृत अनिलकेशरी शाहले समग्रमा कोभिडको असर कम गर्नेगरी योजनाहरु मौद्रिक नीतिमा समेटिएको उल्लेख गरे।
‘अहिले कुनै पनि क्षेत्रलाई सहज समय होइन, आफ्ना लागि मात्रै सबै समाधान आओस् भनेर चाहनु पनि हुँदैन, समग्रमा मौद्रिक नीति सन्तुलन देखिन्छ’ उनले भने।
बैंक तथा वित्तीय संस्थाहरुको साधन प्रवाह अभिवृद्धि गर्न कर्जा स्रोत परिचालन अनुपात (सिसिडी रेसियो)को सीमा ८० प्रतिशतबाट बढाएर ८५ प्रतिशत कायम गर्नु पनि सकारात्मक रहेको उनले बताए।
मौद्रिक नीतिमा २०७८ असार मसान्तसम्म सिसिडी रेसियोलाई अधिकतम ८५ प्रतिशत कायम गरिने उल्लेख छ। यसको अर्थ बैंकहरुले १ सय रुपैयाँ निक्षेप संकलन हुँदा ८० रुपैयाँ लगानी गर्दै आएकोमा अब ८५ रुपैयाँ गर्न सक्नेछन्।
‘अहिले सहज भए पनि लकडाउन खुल्दै गएपछि केही महिनामा सिसिडीमा चाप पर्छ, त्यसकारण यो सर्ट टर्म र लङ टर्मलाई नै मध्यनजर गरेर यो व्यवस्था ल्याइनु राम्रो पक्ष हो’ शाहले भने।
अब अर्थतन्त्रलाई चलायमान बनाउन थप लगानीको आवश्यक पर्ने भएकाले यसले कोभिडको असर न्यून गर्नमा टेवा पुर्याउने उनले बताए। त्यस्तै बजेटमा घोषणा गरिएको पुँजीगत खर्च सुरुआतदेखि नै बढाउनुपर्नेमा उनले जोड दिए।
‘पुँजीगत खर्च अन्तिममा मात्रै नभई आर्थिक वर्षको सुरुआतबाटै बढाउन सक्ने हो भने आन्तरिक रुपमै लगानीका लागि स्रोत बढ्छ’ उनले भने।
बैंकहरुलाई मर्जरका लागि दिएको सहुलियत पनि राम्रो रहेको उनले बताए। बलजफ्ती मर्जमा लैजानुको साटो प्रोत्साहन दिएरै जोड दिनुपर्नेमा मौद्रिक नीतिले जोड दिनु सकारात्मक रहेको उनले बताए।
‘केही प्रोत्साहन पाएमा मर्जमा जान चाहनेलाई यसले सहयोग गर्छ, राम्रो पार्टनर आएमा नविलले नै मर्ज गर्छ’ उनले भने।
