२७ वाणिज्य बैंकमा ६ खर्बले बढ्यो बचत, ऋण विस्तार ४ खर्बमा सीमित

सेतोपाटी संवाददाता

काठमाडौं, भदौ ३

एक वर्षको अवधिमा २७ वाणिज्य बैंकहरुले ६ खर्ब ५ अर्ब रुपैयाँ निक्षेप (बचत) बढाएका छन्।

२७ बैंकहरुले सार्वजनिक गरेको चौथो त्रैमासको वित्तीय विवरणअनुसार एक वर्षमा सो रकमको निक्षेप बढेको हो।

२०७७ असार मसान्तसम्म २७ वाणिज्य बैंकले ३३ खर्ब ७४ अर्ब रुपैयाँ निक्षेप संकलन गरेका छन्, जवकि ०७६ असार मसान्तमा यस्तो निक्षेप २७ खर्ब ६९ अर्ब थियो। यो अरु वित्तीय संस्थाबाट संकलित निक्षेपबाहेकको हो।

रकमका आधारमा मेगा बैंकको निक्षेप सबैभन्दा धेरै ४९ अर्बले बढेको छ। त्यस्तै हालसम्म बढी निक्षेप संकलन गर्ने बैंकमा राष्ट्रिय वाणिज्य बैंक सबैभन्दा अगाडि छ। सो बैंकले गत असार मसान्तसम्म २ खर्ब ३० अर्ब रुपैयाँ निक्षेप संकलन गरेको छ।

निक्षेप उल्लेख्य बढे पनि कर्जा प्रवाह भने केही खुम्चिएको छ।

एक वर्षमा ती बैंकहरुको कर्जा प्रवाह भने ४ खर्ब १० अर्बले मात्रै बढेको छ। एक वर्षको अवधिमा मेगा बैंकले प्रवाह गरेको कर्जा सबैभन्दा उच्च छ। सो बैंकले ४१ अर्ब रुपैयाँ बराबरको कर्जा विस्तार गरेको हो।

मर्जका कारण यो बैंकको निक्षेप र कर्जा प्रवाह धेरै बढेको देखिएको हो। सो बैंकले गण्डकी विकास बैंकलाई प्राप्ती गरेको थियो।

हालसम्म भएको कर्जा प्रवाहका आधारमा ग्लोबल आइएमई बैंक अग्रस्थानमा छ। सो बैंकले असार मसान्तसम्म १ खर्ब ९७ अर्ब रुपैयाँ बराबर कर्जा प्रवाह गरेको छ।

गत आर्थिक वर्षको ४ महिनाको लकडाउनका कारण कर्जा प्रवाहमा असर परेको बताउँछन् राष्ट्रिय वाणिज्य बैंकका सिइओ किरणकुमार श्रेष्ठ।

‘ऋण प्रवाह हुने मुख्य सिजनमै लकडाउन भयो, त्यसकारण सोचेअनुरुप कर्जा विस्तार हुन पाएन’ उनले सेतोपाटीसँग भने।

चैत ११ गतेदेखि भएको लकडाउन गत आर्थिक वर्षभर रह्यो। यसले गर्दा कर्जा प्रवाहमा कमी आएको बैंकर बताउँछन्।

गत आर्थिक वर्ष निक्षेपको तुलनामा कर्जा विस्तार बढ्न नसकेकै कारण अहिले बैंकहरुमा लगानीयोग्य रकम पर्याप्त छ। अर्कोतर्फ बैंकहरुको आधार दर घट्दै गएको छ। गत आर्थिक वर्षको असार मसान्तसम्म वाणिज्य बैंकहरुको आधार दर १ प्रतिशतले घटेको छ।

हेर्नुस् कुन बैंकको निक्षेप र कर्जा प्रवाह कति छ?


बैंक	निक्षेप असार ०७७	निक्षेप असार ०७६	कर्जा असार ०७७	कर्जा असार ०७६
राष्ट्रिय वाणिज्य	२ खर्ब ३० अर्ब	१ खर्ब ८९ अर्ब	१ खर्ब ५५ अर्ब	१ खर्ब ४६
ग्लोबल आइएमई	२ खर्ब १२ अर्ब	१ खर्ब ९२ अर्ब	१ खर्ब ९७ अर्ब	१ खर्ब ८१ अर्ब
एनआइसी एसिया	२ खर्ब १ अर्ब	१ खर्ब ७१ अर्ब	१ खर्ब ७२ अर्ब	१ खर्ब ४९ अर्ब
नविल	१ खर्ब ९० अर्ब	१ खर्ब ६२ अर्ब	१ खर्ब ५४ अर्ब	१ खर्ब ३३ अर्ब
इन्भेष्टमेन्ट	१ खर्ब ६६ अर्ब	१ खर्ब ४९ अर्ब	१ खर्ब ४० अर्ब	१ खर्ब २७ अर्ब
कृषि विकास	१ खर्ब ४३ अर्ब	१ खर्ब १८ अर्ब	१ खर्ब २४ अर्ब	१ खर्ब १० अर्ब
एभरेष्ट	१ खर्ब ४३ अर्ब	१ खर्ब २९ अर्ब	१ खर्ब १९ अर्ब	१ खर्ब १२ अर्ब
नेपाल	१ खर्ब ४२ अर्ब	१ खर्ब १७ अर्ब	१ खर्ब ७ अर्ब	९५ अर्ब
सिद्धार्थ	१ खर्ब ३९ अर्ब	१ खर्ब १४ अर्ब	१ खर्ब २७ अर्ब	१ खर्ब ८ अर्ब
एनएमबि	१ खर्ब ३१ अर्ब	९७ अर्ब	१ खर्ब २० अर्ब	९१ अर्ब
प्रभु	१ खर्ब २८ अर्ब	१ खर्ब ५ अर्ब	१ खर्ब ३ अर्ब	८९ अर्ब
मेगा	१ खर्ब २७ अर्ब	७८ अर्ब	१ खर्ब १३ अर्ब	७२ अर्ब
हिमालयन	१ खर्ब २५ अर्ब	१ खर्ब ९ अर्ब	१ खर्ब ६ अर्ब	९७ अर्ब
प्राइम	१ खर्ब १९ अर्ब	७७ अर्ब	१ खर्ब १४ अर्ब	७५ अर्ब
कुमारी	१ खर्ब १६ अर्ब	७३ अर्ब	१ खर्ब १४ अर्ब	७६ अर्ब
एसबिआई	१ खर्ब १० अर्ब	९७ अर्ब	९४ अर्ब	८८ अर्ब
सानिमा	१ खर्ब ६ अर्ब	८९ अर्ब	९३ अर्ब	८३ अर्ब
माछापुच्छ्रे	१ खर्ब ४ अर्ब	८५ अर्ब	९४ अर्ब	७७ अर्ब
लक्ष्मी	१ खर्ब	८० अर्ब	९१ अर्ब	७६ अर्ब
स्टान्डर्ड चार्टड	९८ अर्ब	७५ अर्ब	५६ अर्ब	५५ अर्ब
बिओके	९२ अर्ब	८२ अर्ब	७९ अर्ब	७३ अर्ब
सनराइज	९० अर्ब	७५ अर्ब	८३ अर्ब	७० अर्ब
सिटिजन्स	८८ अर्ब	७० अर्ब	८० अर्ब	६४ अर्ब
एनसिसी	७३ अर्ब	६५ अर्ब	६७ अर्ब	६३ अर्ब
बंगलादेश	६६ अर्ब	५६ अर्ब	६० अर्ब	५४ अर्ब
सेन्चुरी	६५ अर्ब	६० अर्ब	६० अर्ब	५९ अर्ब