कोरोना भाइरसको संक्रमण फैलिन थालेपछि सरकारले देशका विभिन्न भागमा निषेधाज्ञा तथा विशेष आदेश जारी गरिरहेको छ। स्थानीय सरकार आफैले पनि यस्तै आदेश जारी गरिरहेका छन्।
यस्तो अवस्थामा पनि आधारभुत तथा न्यूनतम बैंकिङ सेवा निरन्तर जारी रहने भएको छ।
नेपाल राष्ट्र बैंकले अहिलेको अवस्थामा सुरक्षाका उपायाहरु लागू गरेर सेवा निरन्तर राख्न निर्देशन दिएको छ। केन्द्रीय बैंकले सूचना जारी गर्दै बैंक तथा वित्तीय संस्थाहरुलाई अहिलेको अवस्थामा विद्युतीय माध्यमबाट हुने कारोबारको सुनिश्चितता प्रदान गरी आफ्ना ग्राहकलाई सम्भव भए सम्म विद्युत माध्यमबाट कारोबार गर्न सूचित गर्न निर्देशन दिएको छ।
त्यस्तै एटिएम मेसिनहरुमा पर्याप्त नगद राखी त्यसको निरन्तर निगरानीको व्यवस्था मिलाउन पनि केन्द्रीय बैंकले निर्देशन दिएको छ।
अत्यावश्यक वस्तुको आपुर्ति सुनिश्चित ड्राफ्ट, टिटि, प्रतितपत्र, ग्यारेन्टी जस्ता कारोबार सञ्चालन हुने व्यवस्था मिलाउनुपर्ने छ। शाखा खोल्नका लागि सम्बन्धित स्थानीय प्रशासनसँग समन्वय गरी सम्भव भएसम्म निश्चित समयका लागि आलोपालो मिलाई न्यूनतम कर्मचारीबाट न्यूनतम संख्यामा शाखा खोली आधारभूत बैंकिङ कारोबार (नगद भुक्तानी/जम्मा, बैंक ट्रान्सफर, चेक क्लियरिङ्ग आदि) जारी राख्ने व्यवस्था मिलाउनका लागि बैंकहरुलाई निर्देशन दिइएको राष्ट्र बैंकले जानकारी गराएको छ।
खुल्ने शाखाहरुको विवरण तथा सम्पर्क व्यक्तिका फोन नम्बर बैंक तथा वित्तीय संस्थाहरुले वेबसाइटमा अद्यावधिक गर्नुपर्ने छ। बन्द रहने शाखाको मूल ढोकामा सर्वसाधारणले देख्ने गरी खुल्ने वैकल्पिक शाखाको विवरण दिनुपर्ने छ।
