हाल कोरोना बीमामा सर्वसाधारणको आकर्षण बढिरहेको छ। पछिल्लो समय कोरोनाको संक्रमण बढ्दै जाँदा बीमा गर्नेहरु र दावी भुक्तानी लिनेहरु पनि बढ्दै गएका छन्।
बीमा समितिका अनुसार निर्जीवन बीमा कम्पनीहरुको पुलमार्फत बीमा गर्नेको संख्या ८ लाख ३४ हजार नाघेको छ। सोवापत ४७ करोड रुपैयाँ बीमा शुल्क आर्जन भएको छ। २ सयभन्दा धेरैले दावी भुक्तानी लिइसकेका छन्।
सरकारले अनुदानमा सबै कर्मचारीको कोरोना बीमा गरिरहेको छ, त्यसकारण कोरोना बीमा गर्नेको संख्या अझै बढ्नेछ।
तर कोरोना बीमा गरेपछि त्यसको दावी भुक्तानीका सम्वन्धमा भने अन्यौलता बढेको छ। बीमा समितिको मापदण्डअनुसार निजी प्रयोगशालामा गरिएको पिसिआर रिपोर्टलाई दावी भुक्तानीका लागि मान्यता दिइँदैन।
समितिले हालै बीमा कम्पनीहरुलाई पत्र पठाउँदै स्वास्थ्य मन्त्रालयका निकायबाट पिसिआर परीक्षण गर्दा पोजेटिभ देखिएमा मात्रै दवी भुक्तानी गर्न भनेको छ।
समितिका सूचना अधिकृत निर्मल अधिकारीले मापदण्डलाई कुनै परिवर्तन गरिएको नभई अहिले स्पष्ट मात्रै पारिएको बताए।
'कोरोना बीमाको दावी भुक्तानी मापदण्डको परिच्छेद ३ को ११ नम्वर बुँदालाई नै अहिले स्पष्ट मात्रै पारिएको हो, मापदण्ड परिवर्तन गरिएको होइन' उनले सेतोपाटीसँग भने।
सो मापदण्डमा नै स्वास्थ्य मन्त्रालय अन्तर्गतका निकायको प्रयोगशालाबाट आएको रिपोर्टलाई मान्यता दिइने कुरा उल्लेख रहेको उनले बताए।
निजी प्रयोगशालाबाट आउने रिपोर्टलाई मान्यता दिइँदा आर्थिक प्रलाेभनमा पारेर, परेर झुटो विवरणमा पोजेटिभ रिपोर्ट बनाउने र त्यसैका आधारमा भुक्तानी दावी हुन सक्ने भएकाले पहिले नै यस्तो व्यवस्था गरिएको बीमा समितिले जनाएको छ।
तर निजी प्रयोगशालालाई पनि सरकारले नै मान्यता दिएको र सरकारी निगरानीमा नै कोरोना परीक्षण भइरहेकाले अलग अलग व्याख्या गर्न नहुनेमा कतिपयको जोड छ।
मापण्दण्डअनुसार सरकारी निकायका पिसिआर प्रयोगशालाको पोजेटिभ रिपोर्टका आधारमा मात्रै दावी भुक्तानी गर्न पाइन्छ।
सूचना अधिकृत अधिकारीका अनुसार पिसिआर रिपोर्ट, दावी भुक्तानीका लागि आवेदन फारम लगायत आवश्यक सबै कागजात बुझाएको ७ दिनभित्र दावी भुक्तानी गर्न कम्पनीहरुलाई निर्देशन दिइएको छ।
यदी कोरोना बीमा गर्ने व्यक्तिको मृत्यु भइसकेको खण्डमा भने सो व्यक्तिले इच्छाएको व्यक्तिलाई बीमा भुक्तानी दावी गरिनेछ।
प्रतिव्यक्ति ६ सय रुपैयाँ शुल्क बुझाएर बीमा गरेकाले १ लाख रुपैयाँ र ३ सय रुपैयाँ बुझाएर गर्नेले ५० हजार रुपैयाँ दावी भुक्तानी पाउँछन्।
याे पनि हेर्नुस्
कोरोना बीमा कसरी गर्ने ?
