मुक्तिनाथ विकास बैंकका ग्राहकले काठमाडौंमा रहेका स्वास्थ्यसँग सम्बन्धित संस्थाहरुमा विशेष छुट पाउने भएका छन्।
मुक्तिनाथ बैंकले भिषा डेविट कार्डवाहक तथा मोवाईल बैंकिङ्ग प्रयोगकर्तालाई ती संस्थाहरुमा छुट दिने विषयमा सम्झौता भएकाे हाे।
जसअन्तर्गत बसुन्धारास्थित काठमाडौँ नेचुरोपेथी अस्पताल, लाजिम्पाटमा रहेको भिजन कन्सर्न, अनामनगरमा रहेको डाक्टर अन कल, लाजिम्पाटको सुरिया हेल्थ कियर र कमलपोखरीस्थित सेन्ट्रल डायग्नोस्टिक ल्याबोरेटोरी रहेका छन्।
यस सम्झौताअनुसार मुक्तिनाथ विकास बैंकका ग्राहकलाई काठमाडौं नेचुरोपेथी अस्पतालकोे सबै उपचारमा १० प्रतिशत छुट दिइने छ।
यसैगरी भर्ना भएर बस्ने बिरामीका लागि शैयामा १० प्रतिशत, चिकित्सक परामर्श शुल्कमा १५ प्रतिशत र स्पा सम्बन्धी सबै सेवामा १० प्रतिशत छुटको व्यवस्था गरिएको छ।
त्यसैगरी लाजिम्पाट, चाबहील र बौद्धमा रहेको भिजन कन्सर्नका विभिन्न सेवा जस्तै, लोकल अप्टिकल सामानमा २५ प्रतिशत, कन्ट्याक्ट लेन्समा १० प्रतिशत र ब्रान्डेड अप्टिकल सामानमा ५ प्रतिशत छुटको व्यवस्था गरिएको छ।
डाक्टर अन कलको विभिन्न सेवा लिदाँ भने २० प्रतिशत सम्मको छुटको व्यवस्था गरिएको छ।
यस सेवाअन्तर्गत स्वास्थ्य सम्बन्धी सेवा जस्तैः डाक्टर परामर्श, फिजियोथेरापी, नर्सिङ्ग कियर, औषधी डेलिभरी र अन्य ल्याबोरेटोरी सेवा घरबाटै लिन सकिनेछ।
सुरिया हेल्थ कियरमा पनि विभिन्न डायग्नोस्टिक सम्बन्धी सेवामा १० प्रतिशत छुट दिइने भएको छ। र अहिले विषम परिस्थीतिलाई लक्षित गरी पिसिआर परीक्षणमा चार सयको विशेष छुटको व्यवस्था गरिएको छ।
त्यसैगरी, कमलपोखरीमा रहेको सेन्ट्रल डायग्नोस्टिक ल्याबोरेटोरीमा पनि पिसिआर परीक्षणमा १० प्रतिशत र अन्य सेवामा १५ प्रतिशत छुटको व्यवस्था गरिएको छ।
डिजिटल बैंकिङ्ग कारोबार बढाउने कार्यमा यस्तो सम्झौताले थप प्रोत्साहान गर्ने अपेक्षा बैंकले लिएको छ।
