नेपाल राष्ट्र बैंकले मौद्रिक समीक्षामार्फत सेयर धितो राखेर दिइने कर्जामा कडाई गर्न खोजेपछि लगानीकर्ताले विरोध जनाएका छन्।
गभर्नर महाप्रसाद अधिकारीलाई ज्ञापनपत्र बुझाउन भन्दै सेयर लगानीकर्ता आज राष्ट्र बैंक पुगे। डेपुटी गभर्नर चिन्तामणि सिवाकोटीलाई उनीहरूले ज्ञापन पत्र बुझाएका छन्। साथै गभर्नर महाप्रसाद अधिकारीसँग यस विषयमा छलफल समेत भएको छ।
सो अवसरमा गभर्नरअधिकारीले सेयर लगानीकर्तासँग छलफल गरेर मात्रै सेयर धितोमा दिइने कर्जाबारे निर्णय गरिने आश्वासन दिएको लगानीकर्ता तारा फुल्लेलले बताए।
ज्ञापनपत्रमा सेयर धितोमा दिइने कर्जाको रकम बढाइएको ३ महिना नपुग्दै घटाइन खोज्नुले आफूहरुलाई चिन्तित बनाएको उल्लेख छ।
ज्ञापनपत्रमा भनिएको छ ‘हामी लगानीकर्ता, नेपाल सरकार, राष्ट्र बैंक, धितोपत्र बोर्डजस्ता सरोकारवाला पक्षबीचको वारम्बार छलफलको निचोडको रुपमा कार्यान्वयनमा आएको ७० प्रतिशत मार्जिन कर्जालाई अकस्मात परिवर्तन गर्न खोज्नु भनेको पुँजी बजारलाई अस्थिर बनाउन राष्ट्र बैंक स्वयम् लागिपरेको र गलत प्रभावमा परेर हतारको रुपमा गरिएको निर्णयको रुपमा लिएका छौँ।’
हाल सेयर धितो राखेर पछिल्लो १२० दिनको औसत बजार मूल्यको ७० प्रतिशतसम्म कर्जा दिन पाइने व्यवस्था छ। यो व्यवस्था हालैको मौद्रिक नीतिले गरेको हो। त्यसअघि ६५ प्रतिशत मात्रै दिइने व्यवस्था थियो।
