बुधबार सेयर बजारलाई बैंकिङ समूहले ओरालो लाग्नबाट थामेको छ।
बैंकिङ समूह २४ अंकले बढेपछि परिसूचक नेप्से ७ अंकमा हरियो रहेको हो। पुँजीकरणका आधारमा सेयर बजारमा बैंकिङ सबैभन्दा बलियो समूह हो। जुन समूहले नेप्से परिसूचक उतारचढावमा ठूलो भूमिका खेलेको हुन्छ।
७ अंकले बढेसँगै परिसूचक २०६८ अंकमा कायम भएको छ। कारोबार खुलेको १० मिनेटमै परिसूचक २१२६ अंकसम्म पुगेको थियो। दिनभरको उतारचढावका वावजुत बजार अन्तिममा ७ अंकले मात्रै बढेको हो।
यस दिन ६ अर्ब ८६ करोड रुपैयाँको सेयर किनबेच भएको छ। बैंकिङ समूहका अलवा जीवन बीमा समूह ३९४ अंकले बढेको छ। अरु सबै समूह झरेका छन्।
ब्यापार १०, होटल १८, विकास बैंक १७, जलविद्युत २२, फाइनान्स ६, निर्जीवन बीमा ५३, उत्पादन २४, अन्य ३६, माइक्रोफाइनान्स ३० अंकले बढेका छन्।
यस दिन नेपाल लाइफ इन्स्योरेन्सको मात्रै १ अर्ब ४३ करोड रुपैयाँ रकमको सेयर किनबेच भएको छ। कुल कारोबार रकममा यो २०. ९ प्रतिशत हो। कम्पनीले हिजो मात्रै ५१ प्रतिशत लाभांश घोषणा गरेको थियो।
कम्पनीले घोषणा गरेको लाभांशमध्ये ३१ प्रतिशत बोनस सेयर र २० प्रतिशत नगद लाभांश हो।
कारोबार खुल्दा कम्पनीको सेयर खरिदमा ठूलो चाप देखिएको थियो भने बिक्रीमा न्यून चाप परेको थियो।
जसले गर्दा कम्पनीको मूल्य प्रतिकित्ता २५८६ रुपैयाँसम्म पुगेको थियो तर अन्तिमतिर बिक्रीमा चाप बढेपछि मूल्य प्रतिकित्ता २४४३ रुपैयाँमा कायम भएको छ।
यस दिन नविल बैंकको मूल्य १० प्रतिशतले बढेको छ। सो कम्पनीको खरिदमा चाप बढेको छ भने बिक्री गर्नेको संख्या न्यून देखिन्छ।
