राष्ट्र बैंकका गभर्नर महाप्रसाद अधिकारीले बैंकहरुलाई मर्जमा जान आग्रह गरेका छन्।
नेपाल बैंकर्स संघको वार्षिक साधारण सभा कार्यक्रममा बोल्दै गभर्नर अधिकारीले भने ‘मर्जमा जान चाहनेलाई राष्ट्र बैंकले सहजीकरण गर्नेछ।’
हाल समग्र आर्थिक अवस्था सन्तोषजनक रहेको उनले औंल्याए।
मूल्यवृद्धि दर नियन्त्रणभित्र रहेको, चालु खाता र शोधनान्तर अवस्था बचतमा रहेको, विदेशी मुद्राको संचिति राम्रो अवस्थामा रहेको उनको भनाइ छ।
राष्ट्र बैंकले भुक्तानी प्रणालीलाई प्राथमिकतामा राखेको बताउँदै गभर्नर अधिकारीले ‘क्युआर कोड’ भुक्तानीलाई थप प्रभाबकारी ढङ्गले अघि बढाउन बैंकहरुलाई निर्देशन दिए।
कार्यक्रममा नेपाल बैंकर्स एसोसिएसनका अध्यक्ष तथा सानिमा बैंकका सिइओ भुवनकुमार दाहालले बैंकिङ क्षेत्रमा कोरोनाको असर आउन बाँकी नै रहेको औंल्याए।
उनले भने ‘पुस मसान्तमा बैंकहरुको पुनर्संरचना तथा पुनर्तालीकीकरण गरेको कर्जा लगायत निष्किृय कर्जाको यथार्थ तस्वीर आउने नै छ।’
बैंकहरुको पूँजी कोषको अवस्था न्यूनतम ८.५ प्रतिशत भन्दा धेरै माथि रहेकाले निक्षेपकर्ताले असुरक्षित ठान्नु पर्ने अवस्था नरहेको उनले बताए। हाल निक्षेप तथा कर्जाको वृद्धिदर सन्तोषजनक रहेको उनको भनाइ छ।
संघले प्रत्येक वर्ष बैंकिङ्ग क्षेत्रमा योगदान दिने व्यक्तिलाई सम्मान गर्दै आएको छ। यस वर्ष नेपाल राष्ट्र बैंकका पूर्व गभर्नर तथा नबिल बैंकका पूर्व अध्यक्ष सत्येन्द्र प्यारा श्रेष्ठलाई सम्मान गरिएको छ।
वार्षिक साधारण सभाले संघको उपाध्यक्ष तथा कार्यकारिणी समितिका दुई जना सदस्यहरु छनौट गरेको छ।
सभाले कृषि विकास बैंकका सिइओ अनिल कुमार उपाध्यायलाई उपाध्यक्षको पदमा निर्विरोध निर्वाचित गरेको छ। एसबिआई बैंकका सिइओ दीपक कुमार दे तथा माछापुच्छ्रे बैंकका सिइओ सन्तोष कोइरालालाई कार्यकारिणी समितिको सदस्य पदमा चयन गरिएको छ।
वार्षिक कार्यक्रममा अर्थ मन्त्रालय, नेपाल राष्ट्र बैंक, विभिन्न संघ/संस्थाका प्रतिनिधिहरुका साथै बैंक तथा वित्तीय संस्थाका पदाधिकारीहरुको समेत उपस्थिति थियो।
