माघ २ गतेदेखि पूर्वाधार (इन्फ्रास्ट्रक्चर) बैंकको प्राथमिक सेयर (आइपिओ) निश्कासन हुने भएको छ।
माघ २ गतेदेखि छिटोमा ६ गतेसम्म र सो अवधिसम्म सम्पूर्ण रुपमा आवेदन नपरेमा मात्र १६ गतेसम्म आवेदन दिन सकिनेछ। आइपिओ निश्कासनका लागि एनआइबिएल एस क्यापिटलले बिक्री प्रबन्धकको जिम्मा लिएको छ।
बैंकले प्रतिकित्ता अंकित मूल्य १ सयका दरले ८ करोड कित्ता सेयर जारी गर्न लागेको हो। सोमध्ये कर्मचारीका लागि १ लाख ६० हजार कित्ता र सामुहिक लगानी कोषका लागि ४० लाख कित्ता छुट्याइएको छ।
बाँकी ७ करोड ५८ लाख ४० हजार कित्ता सर्वसाधारणका लागि बाँडफाँड हुनेछ। आइपिओ निश्कासनका लागि एनआइबिएल एस क्यापिटल बिक्री प्रवन्धकका रुपमा छनौट भएको छ।
बैंकले जारी गर्ने प्राथमिक सेयर अहिलेसम्मकै ठूलो परिमाणको हो। त्यसकारण यो कम्पनीको प्राथमिक सेयर भर्नेजति सबैलाई बाँडफाँड गर्न मिल्छ। बैंकको चुक्ता पुँजी २० अर्ब छ।
पछिल्लो व्यवस्थाअनुसार पुगेसम्म सबैलाई १० कित्ता र त्यसपछि बाँकी रहेको सेयरमा १० ले गुणा जाने अंकको सेयर बाँडफाँड गर्नुपर्छ।
हाल आइपिओमा आवेदन दिनेको संख्या ९ देखि १० लाखको बीचमा हुने गरेको छ। तसर्थ यो कम्पनीको सेयर सबैलाई बाँड्न पुग्नेछ।
कसरी दिने त आवेदन?
नियमित भरिरहनेलाई प्राथमिक सेयरमा आवेदन दिने तरिका थाहा भए पनि नयाँलाई थाहा नहुन सक्छ।
घरमै बसेर अनलाइनबाट प्राथमिक सेयरका लागि आवेदन दिन सकिन्छ। सिडिएससीको मेरो सेयर क्लिक गरी आवेदन दिन सकिन्छ।
आवेदन भर्दा कम्तीमा १० कित्ता वा त्यसभन्दा माथि दिनुपरेमा १० ले गुणा जाने २०, ३०, ४०...अंकमा मात्रै दिनुपर्दछ।
मेरो सेयरको युजरनेम र पासवर्ड नलिएकाले आफ्नो खाता भएको बैंकको जुनसुकै शाखामा गई फारम भरेर बुझाउन सकिनेन्। तर फारम भर्दा डिम्याट खाता भने जरुरत पर्दछ। (यो पनि हेर्नुस्- के हो डिम्याट खाता, कसरी खोल्ने?)
कस्तो छ कम्पनी?
यो विभिन्न विकास आयोजनाहरुमा ऋण लगानी गर्नका लागि स्थापित भएको बैंक हो।
यो बैंकले निक्षेपका रुपमा रकम जम्मा गरी स्रोत जुटाउँछ। त्यस्तै ऋणपत्र जारी गरेर पनि रकम संकलन गर्दछ। संकलित रकम पूर्वाधारका क्षेत्रमा लगानी गर्छ।
आइपिओ निश्कासनपछि बैंकको चुक्ता पुँजी २० अर्ब हुनेछ।
पहिलो त्रैमासिक वित्तीय विवरणअनुसार कम्पनीको प्रतिसेयर आम्दानी ६ रुपैयाँ छ। कम्पनीले सो अवधिमा १८ करोड रुपैयाँ खुद नाफा कमाएको छ।
बैंकले स्रोत संकलन गर्दा कम्तीमा ५ वर्षका लागि हुनेगरी व्यक्तिगततर्फबाट न्यूनतम १ करोड रुपैयाँ र संस्थागततर्फबाट न्यूनतम ५ करोड रुपैयाँ निक्षेपका रुपमा स्वीकार गर्दछ।
संस्थागत निक्षेपकर्तालाई ६.५ देखि ६.६ प्रतिशतसम्मको ब्याज दिन्छ भने व्यक्तिगतलाई ७. २५ प्रतिशतसम्म ब्याज प्रदान गर्दछ। निक्षेपकर्तालाई दिने ब्याज र आयोजना ऋणीबाट लिने ब्याजको अन्तर नै कम्पनीको मुख्य आम्दानी हो।
आब ०७९-८० सम्म प्रतिसेयर नेटवर्थ ११२ रुपैयाँ पुग्ने कम्पनीको आँकलन छ। सो अवधिसम्म वार्षिक आम्दानी १ अर्ब ५९ करोड हुने र प्रतिसेयर आम्दानी ८ रुपैयाँ ८० पैसा पुग्ने कम्पनीको प्रक्षेपण छ।
इक्रा नेपालले कम्पनीको आइपिओलाई एनपी आईआर ट्रिपल बी’ रेटिङ्ग प्रदान गरेको छ। यसले कम्पनी मध्यमस्तरको रहेको जनाउँछ।
४० प्रतिशत सेयर सर्वसाधारणलाई दिन लागिएको यो कम्पनीमा बाँकी ६० प्रतिशत स्वामित्व नेपाल सरकार, व्यवसायिक घराना र विभिन्न बैंक तथा वित्तीय संस्थाको छ।
यसको कार्यालय नयाँ बानेश्वरमा छ।
