सिटिजन्स बैंकले ख वर्गको इजाजत प्राप्त तिनाउ मिसन डेभलपमेन्ट बैंकलाई प्राप्ति गर्ने सम्झौता भएको छ।
बुटवलमा प्रधान कार्यालय रहेको तिनाउलाई प्राप्ति गर्ने गरी अन्तिम सम्झौता पत्रमा आज हस्ताक्षर भएको हो।
सिटिजन्स बैंकको मुख्य कार्यालय नारायणहिटी पथमा आयोजित एक कार्यक्रमका बीच बैंकको तर्फबाट संचालक प्रवल जंग पाण्डे र तिनाउका तर्फबाट संचालक राजेन्द्र प्रसाद ओझाले सम्झौता पत्रमा हस्ताक्षर गरे।
दुवै बैंकले आफ्ना विशेष/साधारण सभाबाट प्राप्ती सम्बन्धी विशेष प्रस्ताव पारित गरी, राष्ट्र बैंकको अन्तिम स्वीकृति पछि एकीकृत कारोबार सुरु हुनेछ।
दुवै बैंकले कात्तिक १ गते प्राप्तीका लागि प्रारम्भिक समझदारीमा हस्ताक्षर गरेका थिए।
२०७७ साल पुस २२ गतेसम्मको तथ्यांकको आधारमा सिटिजन्सले तिनाउलाई प्राप्ती गरेपछि सर्वसाधारणबाट उठाएको निक्षेप करिव १२४ अर्ब रुपैयाँ पुग्नेछ। त्यस्तै सर्वसाधारणलाई दिएको ऋण लगानी करिव १०२ अर्ब रुपैयाँ पुग्नेछ।
प्राप्ति पश्चात बैंकको कुल शाखा संख्या १६३ हुनेछ। सहमति अनुसार, तिनाउ मिसन डेभलपमेन्ट बैंकका शेयरधनीले १०० कित्ता शेयर बराबर सिटिजन्स बैंकको ९६ कित्ता शेयर पाउनेछन्।
सिटिजन्स बैंकको हालको चुक्ता पूँजी ९ अर्ब ८१ करोड रुपैयाँ रहेकोमा प्राप्ती पछिको चुक्ता पुँजी ११ अर्ब ६६ करोड रुपैयाँ हुनेछ।
