सेयर बजारमा दिनदिनै उच्च अंकको रेकर्ड बन्न थालेको छ।
आइतबार २२३५ अंकको उच्च रेकर्ड बनाएको नेप्से परिसूचकले सोमबार २२३९ अंकको रेकर्ड बनाएको छ। कारोबार सुरु भएको ११ मिनेटमै परिसूचक २२६६ अंकसम्म पुगे पनि बेच्नेको चाप बढ्न थालेपछि बजार केहीबेर ओरालो लाग्यो।
त्यसपछिको उतारचढावका बाबजुत बजार बन्द हुँदा ३.७ अंकले नेप्से बढेको हो।
यस दिन कारोबार रकममा भने कमी आएको छ। हिजो ६ अर्ब ३२ करोड रुपैयाँको कारोबार भएकोमा आज ५ अर्ब ५२ करोडको सेयर किनबेच भएको छ।
यस दिन बैंकिङ २, विकास बैंक २८, जलविद्युत ३, फाइनान्स ११, निर्जीवन बीमा समूह १७६ र जीवन बीमा समूह १६१ अंकले बढेका छन्।
त्यस्तै ब्यापार १३, होटल ४, उत्पादन ४१, अन्य १४, माइक्रोफाइनान्स ९ अंकले घटेका छन्।
यस दिन चार कम्पनीको मूल्यमा भने सर्किट लागेको छ। खरिदकर्ताको अत्याधिक चाप तर बिक्रीकर्ता न्यून हुँदा ती कम्पनीको सेयर लगानीकर्ताले चाहेअनुसारको परिमाणमा खरिद गर्न पाएका छैनन्।
आरम्भ चौतारी लघुवित्त, नारायणी डेभलपमेन्ट बैंक, युनाइटेड फाइनान्स र कर्पोरेट डेभलपमेन्ट बैंकको मूल्य १० प्रतिशतको हाराहारीमा बढेको छ। प्रभु लाइफ इन्स्योरेन्सको मूल्य ७.६ प्रतिशतले बढे पनि बिक्री गर्नेहरु छैनन्।
हालै आइपिओ जारीपछि सूचीकृत भई सो कम्पनीको तल्लो रेञ्जबाट कारोबार हुँदा मूल्य जम्मा २२५ रुपैयाँ मात्रै पुगेको छ।
कारोबारका आधारमा सिद्धार्थ बैंक अग्रस्थानमा रह्यो। सो कम्पनीको ४२ करोड रुपैयाँको सेयर किनबेच हुँदा मूल्य प्रतिकित्ता ६ रुपैयाँ बढेर ४७२ रुपैयाँ कायम भयो।
दोस्रोमा रहेको प्रभु बैंकको २५ करोडको कारोबार भयो। मूल्य प्रतिकित्ता ८ रुपैयाँ घटेर ४०६ रुपैयाँ कायम भएको छ।
एनएमबि बैंकको १८ करोडको कारोबार भयो। मूल्य प्रतिकित्ता १४ रुपैयाँ बढेर ४३७ रुपैयाँ कायम भएको छ। यस दिन मल्टिपर्पोज फाइनान्सको मूल्य सबैभन्दा धेरै करिब ६ प्रतिशतले घटेको छ।
