एभरेष्ट बैंकले माउन्ट केटु सफलतापूर्वक आरोहण गरेर स्वदेश फर्किएको दश सदस्यीय नेपाली आरोहण दललाई सम्मान गरेको छ।
हिउँदे याममा आजसम्म कसैले आरोहण गर्न नसकेको केटुको सफल आरोहण गरेर नेपाली र नेपालको इज्जत बढाएको र उत्प्रेरणा दिनेहरुलाई बैंकले सम्मान गरेको जानकारी दिएको छ।
आरोहीहरु उत्प्रेरणा र सफलताका स्रोत भएको र बैंकको उद्देश्य पनि त्यस्तै भएकाले सम्मान गरिएको बैंकका बजार व्यवस्थापन प्रमुख पुष्पराज उप्रेतीले जानकारी दिए।
'हाम्रो बैंकको नाम पनि एभरेष्ट हो। त्यहीअनुसार उहाँहरुले पनि हिमाल आरोहणमा एउटा नयाँ कीर्तिमान कायम राखेकाले सम्मान गरेका हौ' उनले भने।
बैंकले यो टोलीले सफल आरोहण गर्नुअघि नै एकजना आरोहीसँग साझेदारी गरेकाले पनि सम्मान गरिएको जानकारी दिएको छ।
आरोहीमध्येका एक मिङ्ग्मा डेविड शेर्पा बैंकका ब्रान्ड फेसका रुपमा आबद्ध भएका थिए।
पाकिस्तानमा रहेको विश्वकै दोस्रो अग्लो माउन्ट केटुको हिउँदमा सफल आरोहण गरेर नेपाली आरोही दलले कीर्तिमान कायम गरेका थिए।
बैंकले काठमाडौं उपत्याका सबै ब्रान्च म्यानेजर तथा उच्चपदस्थ पदाधिकारीहरुको सहभागितामा आरोही दललाई सम्मान गरेको थियो।
आठ हजार ६ सय ११ मिटर उचाइको केटु हिमालमा हिउँद याममा अहिलेसम्म कसैले पनि आरोहण गरेका थिएनन्। नेपाली १० जना आरोहीले सफलतापूर्वक यो कार्य सम्पन्न गरेका छन्।
नेपालका निर्मल पुर्जा, मिङ्मा जी शेर्पा, मिङ्मा डेभिड शेर्पा, मिङ्मा तेन्जी शेर्पा, गेल्जे शेर्पा, दावा तेम्बा शेर्पा, पेमछिरी शेर्पा, किलुपेम्बा शेर्पा, दावा तेन्जिङ शेर्पा र सोना शेर्पाले केटु आरोहण गरेका हुन्।
