बीमा समितिका नवनियुक्त अध्यक्ष सूर्यप्रसाद सिलवालले बिहीबार सपथ ग्रहण गरेका छन्।
अर्थ मन्त्रालयमा आयोजित कार्यक्रममा अर्थमन्त्री विष्णु पौडेलको उपस्थितिमा अर्थ सचिव शिशिरकुमार ढुङ्गानाले अध्यक्ष सिलवाललाई पद तथा गोपनियताको सपथ गराएका हुन्।
सो क्रममा अर्थमन्त्री पौडेलले बीमा क्षेत्रमा भएका समस्या समाधानका लागि खरोरुपमा उत्रन र आफ्नो कार्यकाल यस क्षेत्रका लागि कोसेढुङ्गा सावित गर्न सिलवाललाई निर्देशन दिए।
पौडेलले बीमा क्षेत्रका समस्याहरु केलाउन निर्देशन दिँदै ती समस्या समाधानका लागि अर्थ मन्त्रालयले सहयोग, सहजीकरण र समन्वय गर्ने बताए।
अर्थ सचिव ढुङ्गानाले बीमा क्षेत्रले विश्वसनियता कायम गर्नु पर्ने आवश्यता औल्याउँदै बीमा क्षेत्रलाई सबल, सक्षम र प्रतिष्पर्धी बनाउनु पर्ने बताए।
राजस्व सचिव रामशरण पुडासैनीले बीमाको पहुँच बढाउन र बीमा क्षेत्रको सुशासन कायम गर्ने कार्यमा विशेष जोड दिनुपर्ने आवश्यकता रहेको औंल्याए।
नवनियुक्त अध्यक्ष सिलवालले बीमा क्षेत्रको सुधारका लागि खरो रुपमा उत्रने र फास्ट ट्रयाकमा काम गर्ने प्रतिवद्धता व्यक्त गरे। उनले तत्काल देखा परेका समस्या समाधान गर्दै नीतिगत क्षेत्रमा प्रवेश गर्ने बताए।
