३६ हजार ५६९ जनाले कोरोना बीमाको भुक्तानी लिएका छन्।
कोरोना बीमा गरेपछि संक्रमित भएका सो संख्याले कुल ३ अर्ब ५५ करोड २९ लाख २५ हजार रुपैयाँ भुक्तानी लिएका छन्। गत बिहीबारसम्म सो संख्याले भुक्तानी लिएको बीमा समितिले जनाएको छ।
औसतमा एक जना व्यक्तिले ९७ हजार रुपैयाँ कोरोना बीमाको भुक्तानी लिएका छन्। १ लाख र ५० हजार गरी दुई बीमा लेख जारी भएका थिए।
समितिका अनुसार अरु २८ हजार ९५० जना कोरोना बीमाका लागि योग्य देखिएका छन्। उनीहरुको कागजात प्रक्रिया पुरा भएको छ।
बीमाको भुक्तानी माग गर्दै परेको आवेदनमध्ये थप ९ हजार वटा आवेदन इपिडिमियोलोजी तथा रोग नियन्त्रण महाशाखामा प्रमाणितका लागि प्रक्रियामा छन्।
त्यस्तै ३६५ आवेदन भने रद्द भएका छन्। दोहोरो बीमा गरेका र प्रमाणित नभएका ती आवेदन रद्द भएको समितिको सूचनामा उल्लेख छ।
भदौ २९ पछि बीमा गरी संक्रमित भएकाहरुले भने कुल बीमा रकमको २५ प्रतिशत मात्रै नगद पाउने र बाँकी ७५ प्रतिशत रकम उपचारमा लागेको खर्चको बिल, भर्पाइका आधारमा पाउने व्यवस्था गरिएको थियो।
निर्जीवन बीमा कम्पनीहरुको पुलमार्फत कोरोना बीमा गराइरहेका छन्। कोरोना बीमा गरेकाहरु चैत मसान्तसम्म संक्रमित भएमा उनीहरुले बीमाको रकम पाउने छन्।
कोरोना बीमाको भुक्तानी साढे ३ अर्ब रुपैयाँ नाघिसकेकाले अबको सबै दायित्व सरकारमा सरेको छ। साढे ३ अर्बभन्दा बढी रकम भुक्तानी गर्नुपरेमा सरकारले ब्यहोर्ने कोरोना बीमा मापदण्डमा उल्लेख छ।
