जोखिम नलिइकन लगानी गर्न चाहनेलाई अर्को एउटा अवसर खुलेको छ।
नेपाल राष्ट्र बैंकले नागरिक बचतपत्र निष्कासन गर्न लागेको छ। सो नागरिक बचतपत्रमा भोलि मंगलबारदेखि इच्छुक नागरिकले आवेदन दिन सक्ने छन्।
‘नागरिक बचतपत्र २०८२ क’ नामको यो बचतपत्रमा लगानी गर्नेले ९ प्रतिशत ब्याज पाउँछन्। जुन दर हाल वाणिज्य बैंकहरुले मुद्दती खातामा दिएको ब्याजभन्दा बढी हो।
हाल वाणिज्य बैंकहरुले मुद्दती निक्षेपमा ७.२५ र केहीले बढीमा ८ प्रतिशतसम्म ब्याज दिइरहेका छन्।
नागरिक बचतपत्रको अवधि ५ वर्षको छ। लगानी गर्नेले ६–६ महिनामा ब्याज पाउने छन्। ५ वर्षपछि साँवा रकम फिर्ता हुनेछ।
राष्ट्र बैंकले जारी गर्ने यो बचतपत्रमा जोखिम कम हुन्छ। सरकारले आन्तरिक ऋण उठाउन राष्ट्र बैंकमार्फत यस्तो बचतपत्र निष्कासन गर्ने गरेको छ।
एक व्यक्तिले कम्तीमा १० हजार रुपैयाँ लगानी गर्नेगरी आवेदन दिन सक्ने छन्।
फागुन १८ गतेसम्म इच्छुक नेपाली नागरिकले आवेदन दिन सक्ने राष्ट्र बैंकले जनाएको छ। विभिन्न बैंक तथा वित्तीय संस्थाका शाखा कार्यालयबाट आवेदन फारम लिनुपर्नेछ। फारमको कुनै शुल्क लाग्दैन।
भरेको फारम तिनै बैंक तथा वित्तीय संस्था वा राष्ट्र बैंकको प्रादेशिक कार्यालयमा बुझाउन सकिनेछ।
आवेदन दिँदा नेपाली नागरिकताको प्रमाणपत्रको प्रतिलिपी, नाबालकको नाममा बचतपत्र खरिद गर्ने भएमा संरक्षकको नागरिकताको प्रमाणपत्र र नाबालकको जन्म दर्ता प्रमाणपत्रको प्रतिलिपी पेश गर्नुपर्नेछ।
यदि रीतपूर्वक पेश नभई आवेदन अस्वीकृत भएमा सोको रकम ७ दिनभित्रै फिर्ता हुनेछ। आवेदन स्वीकृत भएपछि राष्ट्र बैंकले सोको प्रमाणपत्र दिनेछ।
