बैंकिङ समूहले सोमबारको सेयर बजार उचालेको छ।
सो समूह ६२ अंकले बढेपछि समग्र परिसूचक नेप्से ३७ अंकले बढेको छ। सो समूहको पुँजीकरण सबैभन्दा बढी भएकाले बजारमा यो सबैभन्दा शक्तिशाली रहने गरेको छ।
यस दिनको कारोबारपछि परिसूचक २५६१ अंकमा पुगेको छ। जुन अंक हालसम्मकै उच्च हो। यस दिन २०५ कम्पनीको १० अर्ब १७ करोड रुपैयाँ बराबरको सेयर किनबेच भएको छ।
बैंकिङ समूहका अलवा होटल २८, विकास बैंक ८६, फाइनान्स २२, अन्य ९ र जीवन बीमा समूह २११ अंकले बढेका छन्।
ब्यापार ३, जलविद्युत १९, निर्जीवन बीमा १३१ र उत्पादन समूह ७४ अंकले घटेका छन्। ग्रामीण विकास लघुवित्त र प्रभु बैंकको मूल्य ९ प्रतिशतभन्दा धेरैले बढ्यो।
त्यस्तै प्रभु बैंककै संस्थापक समूहको मूल्य ८.७ प्रतिशतले बढ्यो। सनराइज बैंकको सेयर मूल्य ८.४ र माछापुच्छ्रेको ८.३ प्रतिशतले बढेको छ। छ्याङ्दी हाइड्रोपावर, गरिमा विकास बैंक र सूर्योदय लघुवित्तको मूल्य ७ प्रतिशतको हाराहारीमा बढेको छ।
कारोबारका आधारमा यस दिन प्रभु बैंक अग्रस्थानमा रह्यो। सो कम्पनीको ५८ करोड रुपैयाँको कारोबार हुँदा मूल्य प्रतिकित्ता ९ प्रतिशतले बढेर ४७६ रुपैयाँ कायम भएको छ।
त्यस्तै नबिल बैंकको ३२ करोड रुपैयाँ बराबरको कारोबार भएको छ। मूल्य प्रतिकित्ता ११६५ रुपैयाँ कायम भएको छ। डिप्रोक्स लघुवित्त र ग्लोबल आइएमई बैंक पनि कारोबारका आधारमा अगाडि रहे।
गुमाउनेमा हिमालय उर्जा विकास कम्पनीका लगानीकर्ता अगाडि रहे। सो कम्पनीको मूल्य ६.७ प्रतिशतले घटेको छ। त्यस्तै उन्नति सहकार्य लघुवित्तको ६.३, स्वाभिमान लघुवित्तको मूल्य ५.४ प्रतिशतले घटेको छ।
