सिटिजन्स बैंकले सिर्जना फाइनान्सलाई प्राप्ति गर्ने भएको छ।
बिराटनगरमा प्रधान कार्यालय रहेको ग वर्गको सिर्जना फाइनान्सलाई प्राप्ति गर्नेगरी बुधबार प्रारम्भिक सम्झौता पत्रमा हस्ताक्षर भएको बैंकले जनाएको छ।
विराटनगरमा आयोजित एक कार्यक्रममा बैंकको तर्फबाट संचालक, मर्जर तथा प्राप्ति समितिका संयोजक प्रवलजंग पाण्डे र सिर्जना फाइनान्सका तर्फबाट संचालक, मर्जर तथा प्राप्ति समितिका संयोजक सुवास आचार्यले उक्त सम्झौतापत्रमा हस्ताक्षर गरे।
नेपाल राष्ट्र बैंकको अन्तिम स्वीकृति पश्चात तिनाउ मिसन डेभलपमेण्ट बैंकलाई प्राप्ति गरी संयुक्त कारोबार प्रारम्भ गर्ने गरी तयारीहरु भइरहेको बैंकले जनाएको छ।
२०७७ साल माघ २७ गते सम्मको तथ्यांकको आधारमा सिटिजन्स बैंकले सिर्जना फाइनान्सलाई समेत प्राप्ति गरेपछि सर्वसाधारणबाट उठाएको निक्षेप करिब १ खर्ब ३४ अर्ब रुपैयाँ हुनेछ भने सर्वसाधारणलाई दिएको ऋण लगानी करिव १ खर्ब ११ अर्ब रुपैयाँ हुनेछ।
प्राप्ति पश्चात बैंकको कुल शाखा १८८ हुनेछ। हाल यस बैंकको प्रदेश नं १ मा १३ वटा शाखा रहेकोमा सिर्जना फाइनान्सको प्राप्ति पश्चात् उक्त प्रदेशमा बैंकको जम्मा २७ वटा शाखा र प्रदेश नं २ मा २१ वटा शाखा रहेकोमा प्राप्ति पश्चात उक्त प्रदेशमा २८ वटा शाखाहरु हुनेछन्।
शेयर स्वाप रेसियो विस्तृत मूल्यांकन प्रतिवेदनद्वारा सिफारिस भए बमोजिम निर्धारण गर्ने सहमति भएको छ।
प्राप्ति पश्चात बैंकको पहुँच बढ्न गई प्रतिस्पर्धात्मक क्षमतामा वृद्धि हुने, बैंकको वित्तीय, मानव–संशाधनका साथै प्राविधिक एवं अन्य क्षमताको अभिवृद्धि भई ग्राहकलाई आधुनिक, गुणस्तरीय तथा भरपर्दो बैंकिङ्ग सुविधा प्रदान गर्न सहज हुने र देशको बैंकिङ्ग तथा वित्तीय प्रणालीलाई सुशासित, सुरक्षित, स्वस्थ, कुशल तथा सक्षम बनाई वित्तीय क्षेत्रको स्थायित्व कायम गर्न मद्दत पुग्ने बैंकको भनाइ छ।
सिटिजन्स बैंकका हाल देशभर १०९ वटा शाखा, ९८ वटा एटिएम र १०७ वटा शाखा रहित बैंकिङ्ग इकाईहरु सञ्चालनमा छन्।
करिव सात लाख ग्राहकले सेवा लिँदै आएको बैंकले जनाएको छ।
