कालिका पावर कम्पनीले पुस मसान्तसम्मको अवधिमा ५ करोड ३६ लाख रुपैयाँ नाफा कमाएको जनाएको छ।
यो अघिल्लो पुस मसान्तसम्मको नाफाभन्दा ९१ दशलमव ४६ प्रतिशतले बढी हो।
शुक्रबार भरतपुरमा भएको १३ औं वार्षिक साधारणसभामा कम्पनीका सञ्चालक पदम गुरूङले सुरूआती दिनमा नाफा नभएपछि पछिल्ला वर्ष कम्पनी लगातार नाफामा गइरहेको भन्दै अर्को वर्षबाट बोनस बाँड्ने निर्णय भएको बताए।
उक्त कम्पनीले हालसम्म विद्युत विक्री गरेर ११ करोड २७ लाख ७३ हजार ३ सय ३६ रुपैयाँ आम्दानी गर्न सफल भएको जनाएको छ।
विगतको तुलनामा ३ दशलमलव १५ प्रतिशत बढी विद्युत विक्री गरेर आम्दानी गरेको गुरूङले बताए।
२०६४ साल फागुन २४ गते गोरखामा दरौदी कालिका हाइड्रो प्रालिका रूपमा दर्ता भएको संस्था २०७२ साल असोजदेखि पब्लिक कम्पनी कालिका पावर कम्पनी लिमिटेड बनेको थियो।
उक्त कम्पनीले गोरखाको अजिरकोट गाउँपालिकाको मुच्चोक, सौरपानीमा बहने दरौंदी खोलाबाट २०७३ सालदेखि ६ मेगावाट विद्युतको व्यापारिक रूपमा उत्पादन गर्दै आएको छ।
कालिका पावरले छिट्टै ४ वटा जलविद्युत आयोजनामा लगानी गर्ने गरी अध्ययन अगाडि बढाएको कम्पनीका अध्यक्ष तथा प्रबन्ध सञ्चालक विक्रम पाण्डेले बताए। पूर्वमन्त्री पाण्डेले कालिका पावरलाई देशकै ठूलो जलविद्युत कम्पनीका रूपमा स्थापित गर्ने लक्ष्य रहेको बताए।
‘४ प्रोजेक्ट पाइपलाइनमा छन्, तर अनेक हतकण्डाले गर्दा काम गर्नै दिइएको छैन,’ उनले भने, ‘कैयन अप्ठ्यारा दिन पार गरेर आइसकेका छौं। हामी अगाडि बढ्छौं, कम्पनीलाई देशकै ठूलो कम्पनी बनाउने छौं।’
उनले ऊर्जा क्षेत्रमा हुने लगानीले देशकै अर्थतन्त्रमा सघाउने भएकाले जलविद्युत कम्पनीलाई प्रोत्साहन गर्ने नीति अवलम्बन गर्न सरकार अग्रसर बन्नुपर्ने बताए।
कम्पनी सचिव किशोरकुमार डंगोलकाअनुसार ४२ लाख कित्ता संस्थापक शेयर, ६ लाख कित्ता कर्मचारी सेयर र १२ लाख कित्ता सर्वसाधारणको गरी कम्पनीको कुल शेयर ६० लाख कित्ता छ।
