जीवन बीमा कम्पनीहरुलाई पूर्वाधार क्षेत्रमा अनिवार्य लगानी गर्न नियामक बीमा समितिले निर्देशन दिएको छ।
बीमा कम्पनीहरुले बीमितबाट संकलन भएको रकम बैंक खातामा मात्रै जम्मा गर्ने गरेको भन्दै समितिले पूर्वाधार क्षेत्रमा लगानी गर्न निर्देशन दिएको हो।
‘बीमा कम्पनीहरुको लगानीसम्वन्धी निर्देशिकाअनुसार पूर्वाधार क्षेत्रमा भनेजति लगानी भएको पाइँदैन, निर्देशिकामा तोकिएअनुसार लगानी गर्न निर्देशन दिएका हौं’ समितिका अध्यक्ष सूर्यप्रसाद सिलवालले सेतोपाटीसँग भने।
जीवन बीमा कम्पनीहरुले टेक्निकल रिजर्भको २० प्रतिशत रकम पूर्वाधारमा ऋण वा पुँजीवापत लगानी गर्न सक्ने व्यवस्था निर्देशिकामा छ।
बीमा कम्पनीहरुले बीमितलाई भविष्यमा तिर्नुपर्ने दायित्वको रकम सुनिश्चित गर्ने कोष नै टेक्निकल रिजर्भ हो।
मुद्दती निक्षेपमा निर्देशिकाले तोकेको सीमाभन्दा बढी लगानी गर्ने तर अन्य क्षेत्रमा लगानी कम भएपछि समितिले कम्पनीहरुलाई निर्देशन जारी गरेको छ।
कम्पनीहरुले गरेको कुल लगानीमध्ये ६४ प्रतिशत बैंक तथा वित्तीय संस्थामा निक्षेपका रुपमा मात्रै लगानी भएको छ।
‘बैंक, टेलिकम, नागरिक लगानी कोषजस्ता संस्थाले कृषि, पर्यटन तथा उर्जाजस्ता क्षेत्रमा लगानी बढाइरहँदा बीमा कम्पनीहरुले गरेनन्, खाली बैंकमा राखेर मात्रै कमाउने स्थिति हुनु भएन’ अध्यक्ष सिलवालले भने ‘मुलुकलाई जीवन बीमा कम्पनीहरुको योगदान देखिएन।’
सीमित केही कम्पनीले थोरै मात्रामा लगानी गरे पनि अधिकांशले पूर्वाधार क्षेत्रमा लगानी नै नगरेको उनले बताए।
‘सबै कम्पनीहरुले कम्तिमा १/२ प्रतिशत त लगानी गर्नुपर्यो नि’ अध्यक्ष सिलवालले भने।
बीमा कम्पनीहरुलाई जारी भएको निर्देशिकाअनुसार घरजग्गा व्यवसायमा ५ प्रतिशत, बैंक तथा वित्तीय संस्थाको निक्षेपमा ४० प्रतिशत, सूचीकृत कम्पनीहरुको साधारण सेयरमा २० प्रतिशत, ऋणपत्रमा २० प्रतिशत, सरकारको वचतपत्र वा ऋणपत्रमा ५ प्रतिशतसम्मको लगानी गर्न पाउने व्यवस्था छ।
त्यस्तै कृषि, पर्यटन, जलस्रोत लगायतका पूर्वाधारमा ऋण वा पुँजीवापत २० प्रतिशतसम्म तथा नागरिक लगानी कोष र म्युचुअल फण्डका योजनामा ५ प्रतिशतसम्म लगानी गर्न पाउने व्यवस्था छ।
