सेयर बजारमा हाल ११ वटा समूहहरु रहेकोमा एउटा थप गरी १२ वटा पुर्याइएको छ। ‘लगानी’ नामक समूह थप गरिएको हो।
थपिएको लगानी समूहमा अन्य समूहबाट ४ कम्पनी सारिएको नेप्सेका प्रवक्ता मुराहरि पराजुलीले जानकारी दिए।
हालै सूचीकृत भएको नेपाल इन्फ्रास्ट्रक्चर बैंक (निफ्रा)सहित नागरिक लगानी कोष, जलविद्युत लगानी तथा विकास कम्पनी, र एनआरएन इन्फ्रास्ट्रक्चर एण्ड डेभलपमेन्टलाई अन्यबाट लगानी समूहमा सारिएका छन्।
विभाजित समूहअनुसार आइतबारदेखि सूचकहरुको गणना हुनेछ।
त्यस्तै होटल समूहलाई केही फराकिलो बनाउन अबदेखि सो समूहको नाम होटल तथा पर्यटन राखिएको छ। चन्द्रागिरि हिल्स पनि यही समूहमा परेको छ। चन्द्रागिरि हिल्ससहित यो समूहमा ओरियन्टल होटल, सोल्टी, तारागाउँ रिजेन्सी र याक एण्ड यती छन्।
नेप्सेले सूचीकृत ११८ कम्पनीहरुको प्रकृति, क्षेत्रअनुसार समूहगत रुपमा विभाजन गरी समूहगत सूचक गणना गर्दै आएको छ।
हाल बैंकिङ, विकास बैंक, होटल, फाइनान्स, ब्यापार, जलविद्युत, निर्जीवन बीमा, उत्पादन तथा प्रशोधन, अन्य, माइक्रोफाइनान्स, जीवन बीमा सेयर बजारका समूहहरु छन्।
म्युचुअल फण्ड समेत जोड्दा अब १३ वटा समूहरु हुने छन्। अब १३ सहित नेप्से, सेन्सेटिभ, सेन्सेटिभ फ्लोट गरी १६ वटा सूचकको छुट्टाछुट्टै अंक गणना हुनेछ।
यी समूहमा पर्ने कम्पनीहरुको समग्र पुँजीकरण अघिल्लो दिनको तुलनामा बढ्न गएमा समूहको सूचक बढ्छ भने घट्न गएमा समूहगत सूचक घट्न जान्छ। समूहगत रुपमा सूचकलाई जनाउनका लागि म्युचुअल फण्डबाहेक १२ वटा समूह निर्धारण गरिएको छ।
