साताको पहिलो दिन आइतबार सेयर बजारमा ८० अंकको गिरावट आएको छ। ७९. ७४ अंकले झरेपछि बजार २४७४ अंकमा आएको हो।
परिसूचक घटे पनि कारोबार रकम भने उल्लेख्य देखिन्छ। २०७ कम्पनीको ८ अर्ब ३५ करोड रुपैयाँको सेयर किनबेच भयो।
यस दिन होटल तथा पर्यटनबाहेक सबै समूह घटेका छन्। सो समूह ११ अंकले बढ्यो।
बैंकिङ ५४, ब्यापार ११, विकास बैंक ७५, जलविद्युत ६७, फाइनान्स २९, निर्जीवन बीमा १७८, उत्पादन १९८, अन्य ८१, माइक्रोफाइनान्स १४१, जीवन बीमा ६२४ तथा लगानी समूह ४ अंकले घटेका छन्।
लगानी हालै थपिएको समूह हो। यस दिन चन्द्रागिरि हिल्सको मूल्य भने १० प्रतिशतले बढ्यो। प्रतिकित्ता ३७ रुपैयाँले बढेर कम्पनीको मूल्य प्रतिकित्ता ४१४ रुपैयाँ कायम भएको छ।
गणपति माइक्रोफाइनान्सको मूल्य सबैभन्दा धेरै ७ प्रतिशतले घटेको छ। त्यस्तै नेपाल फाइनान्स र नेपाल इन्फ्रास्ट्रक्चर बैंक (निफ्रा)को मूल्य ६ प्रतिशतभन्दा धेरैले घटेको छ।
निफ्राको मूल्य प्रतिकित्ता ३५ रुपैयाँले घटेर ५०८ रुपैयाँमा झरेको छ। यस दिन शिखर इन्स्योरेन्सको सबैभन्दा धेरै १ अर्बको कारोबार भएको छ। त्यस्तै निफ्राको ६३ करोड रुपैयाँ बराबरको कारोबार भयो।
