धादिङको मलेखु बजारमा क्युआर कोडको माध्यमबाट हुने भुक्तानी प्रणाली सुरु भएको छ। कुमारी बैंक र फोनपेको सयुक्त सहकार्यमा उक्त सेवा विस्तार गरिएको हो।
शुक्रबार कुमारी बैंकका प्रमुख कार्यकारी अधिकृत सुरेन्द्र भण्डारीले क्यूआर मार्फत् भुक्तानी गर्दै डिजिटल मलेखु बजारको उद्घाटन गरेका थिए।
उनले विभिन्न व्यवसायीहरुलाई क्यूआर कोड समेत हस्तान्तरण गरेका थिए।
यो सँगै मलेखुका हरेक पसलमा क्यूआर मार्फत भुक्तानी गर्न सकिन्छ । क्युआर मार्फत भुक्तानी गर्न सकिने भएसँगै मलेखुमा खाना खाँदा तथा किनमेल गर्नका लागि नगद रकम बोक्नुपर्ने बाध्यताबाट मुक्ति मिल्ने भण्डारीले बताए।
शुक्रबार डिजिटल बजार उद्घाटन गर्दै बेनीघाट रोरांग गाउँपालिकाका अध्यक्ष पित्त बहादुर डल्लाकोटीले सुरक्षित कारोबारका लागि क्यूआर प्रविधि अत्यन्त उपयोगी रहेकाले बेनीघाट नगरपालिकाका व्यवसायीलाई प्रविधिको प्रयोग गर्न आग्रह गरे।
कार्यक्रममा एफवान सफ्ट इन्टरनेशनलका अध्यक्ष विश्वास ढकाललले मलेखु बजार राजधानी छिर्ने नाकाको मुख्य बजार भएको हुनाले यस बजारलाई डिजिटल बजारका रुपमा विकास गरेर उदाहरणीय बनाउन आवश्यक रहेको बताए।
कुमारी बैंकले हालसम्म देशभर आठहजार क्युआर स्टल वितरण गरिसकेको छ। मलेखुमा सयजना व्यवसायीलाई वितरण गरिएको प्रमुख कार्यकारी अधिकृत भण्डारीले जानकारी दिए।
