साताको पहिलो दिन आइतबार सेयर बजारको परिसूचक नेप्से ६३ अंकले बढेको छ।
सो अंकको वृद्धिपछि परिसूचकले २५ सय अंक पार गरेको छ। यस दिनको कारोबारपछि नेप्से २५३८ अंकमा कायम भएको छ। यस दिन कारोबार रकममा पनि वृद्धि भएको छ। ५ अर्ब ९१ करोड रुपैयाँको सेयर किनबेच भयो।
सबै समूहहरु बढेका छन्। बैंकिङ २६, ब्यापार १३, जलविद्युत तथा पर्यटन १५३, विकास बैंक ४६, जलविद्युत १३, फाइनान्स ६, निर्जीवन बीमा ५६१, उत्पादन १७२, अन्य ५७, माइक्रोफाइनान्स २४६, जीवन बीमा ७४२ र लगानी समूह १ अंकले बढेका छन्।
यस दिन खासगरी माइक्रोफाइनान्स कम्पनीका लगानीकर्ताले धेरै मूल्य कमाएका छन्। सूर्योदय, स्वरोजगार, मिथिला, सामुदायिक, समिट, किसान, स्वाभिमान लघुवित्तको मूल्य १० प्रतिशतले बढ्यो। त्यस्तै चन्द्रागिरि हिल्स र युनाइटेड इदी मर्दीको मूल्य पनि १० प्रतिशतले नै बढेको छ। ग्रीन लाइफ हाइड्रोको मूल्य सबैभन्दा धेरै ६ प्रतिशतले घटेको छ।
नेपाल बंगलादेश बैंकको सबैभन्दा धेरै ३९ करोड ९० लाख रुपैयाँ बराबरको कारोबार भयो भने मूल्य प्रतिकित्ता ६ रुपैयाँ बढेर ३५५ रुपैयाँ कायम भयो। नेपाल लाइफ इन्स्योरेन्सको ३१ करोड रुपैयाँ बराबरको कारोबार हुँदा मूल्य बढेर प्रतिकित्ता २२२० रुपैयाँ कायम भयो।
