सिभिल बैंकको कायम मुकायम प्रमुख कार्यकारी अधिकृतका रुपमा सुनिल कुमार पोखरेललाई जिम्मेवारी दिइएको छ।
प्रमुख कार्यकारी गोविन्द गुरुङले पदबाट दिएको राजीनामा आइतबार बसेको संचालक समितिको बैठकले बैशाख १८ गतेदेखि लागू हुनेगरी स्वीकृत गरेको छ।
सो बैठकले नै नायब प्रमुख कार्यकारी अधिकृत सुनिल कुमार पोखरेललाई कायम मुकायम प्रमुख कार्यकारी अधिकृतको जिम्मेवारी दिएको हो।
सिभिल बैंकमा बि.सं.२०६९ असोज २१ मा नायब प्रमुख कार्यकारी अधिकृतको रुपमा आवद्ध भएका गुरुङले बि.सं. २०७४ बैशाख १२ मा कार्यवाहक प्रमुख कार्यकारी अधिकृतको रुपमा र बि.सं. २०७४ साउन ११ देखि प्रमुख कार्यकारी अधिकृतको पदभार सम्हालेका थिए।
बैंकले चेन्ज म्यानेजमेन्ट मार्फत संस्थागत संस्कार, कार्यगत संस्कार, कर्जाको गुणस्तर, संस्थागत संरचनामा व्यापक सुधार गरी हाल व्यवसायको आयतनमा व्यापक वृद्धि गरेको छ।
गुरुङले प्रमुख कार्यकारी अधिकृतको पदभार सम्हाल्दा बैंकको निक्षेप ३३ अर्व ८१ करोड, कर्जा ३१ अर्व १९ करोड रहेकोमा हाल बैंकको निक्षेप ८७ अर्व ८९ करोड, कर्जा ८१ अर्व ४४ करोड पुगेको छ।
त्यस्तै निष्कृय कर्जा अनुपात ४.६६ प्रतिशतबाट १.७ प्रतिशतमा घटेको छ। शाखा संख्या ५१ बाट ११४ पुगेको छ। गुरुङकै कार्यकालमै यूनिक फाईनान्स र हामा मर्चेन्ट एण्ड फाइनान्सलाई बैंकमा मर्ज गरिएको थियो।
