वैशाख लागेसँगै वाणिज्य बैंकहरुमा निक्षेप घटेको छ।
चैत ३१ गतेसम्म बैंकहरुमा ३९ खर्ब ४४ अर्ब रुपैयाँ निक्षेप संकलन भएकोमा बैशाख १० गतेसम्म आउँदा ३९ खर्ब २२ अर्ब रुपैयाँमा झरेको छ। १० दिनमै वाणिज्य बैंकहरुमा २२ अर्ब रुपैयाँ निक्षेप घटेको छ।
त्यस्तै सो अवधिमा कर्जा प्रवाह भने १० अर्बले बढेको छ। नेपाल बैंकर्स एसोसिएसनको तथ्यांकअनुसार चैत ३१ गतेसम्म ३५ खर्ब ७३ अर्ब रुपैयाँ कर्जा प्रवाह भएकोमा वैशाख १० गतेसम्म ३५ खर्ब ८३ अर्ब रुपैयाँ प्रवाह भएको छ।
निक्षेप रकम घट्दै जाने तर कर्जा प्रवाह बढ्दा बैंकहरुमा लगानीयोग्य रकममा दवाव परिरहेको छ। यद्यपि जेठ लागेपछि सरकारको पुँजीगत खर्च बढ्ने र त्यसले तरलताको व्यवस्थापनमा असहज नहुने बैंकरको भनाइ छ।
तरलता टाइट हुँदा यसको सबैभन्दा ठूलो असर ब्याजदरमा पर्दछ। बैंकहरुले प्रवाह गरेको ऋणमा ब्याजदर बढ्न जानेछ। त्यसले उद्योग व्यवसायीलाई उत्पादन लागत महँगो पर्न जानेछ।
एकातिर स्वदेशी उत्पादन नै महँगो हुन गई विदेशीसँग प्रतिस्पर्धा गर्न नसक्ने र अर्कोतर्फ उपभोक्तालाई मूल्यवृद्धिको मार थपिन जान्छ।
