मंगलबार एकाएक सेयर बजारमा ९२ अंकको उछाल आएको छ।
अघिल्लो दिनसम्म उच्च अंकले बजार घटेकोमा सेयर सस्तो भएपछि आज एक्कासी खरिद गर्नेको चाप बढेको हो। ९२. ४६ अंकको वृद्धिपछि परिसूचक नेप्से २५९९ अंकमा कायम भएको छ।
कारोबार रकम भने खुम्चिएको छ। आज जम्मा ५ अर्ब १० करोड रुपैयाँ बराबरको सेयर किनबेच भयो।
सबै समूहहरु उकालो लागेका छन्। बैंकिङ ४५, ब्यापार १९०, होटल तथा पर्यटन ३९, विकास बैंक ९३, जलविद्युत १५३, फाइनान्स ३५, निर्जीवन बीमा ५४३, उत्पादन २३९, अन्य ६९, माइक्रोफाइनान्स २३७, जीवन बीमा ५५८ र लगानी समूह ४ अंकले बढेका छन्।
यस दिन माथिल्लो तामाकोसीको मूल्य १० प्रतिशतले बढेको छ। प्रतिकित्ता ७७ रुपैयाँले मूल्य बढेर ८४७ रुपैयाँ कायम भएको छ। कारोबारका आधारमा पनि यस दिन सो कम्पनी अग्रस्थानमा रह्यो। कम्पनीको २३ करोड रुपैयाँ बराबरको कारोबार भयो।
माथिल्लो तामाकोसीका अलवा विशाल बजार कम्पनी, महिला लघुवित्त वित्तीय संस्था, युनाइटेड इन्स्योरेन्स, समिट लघुवित्त, मल्टिपर्पोज फाइनान्स र ग्लोबल आइएमई लघुवित्तको मूल्य करिब १० प्रतिशतले बढेको छ।
गुडविल फाइनान्सको मूल्य भने २ प्रतिशतले घटेको छ। त्यस्तै चन्द्रागिरि हिल्को मूल्य पनि घटेको छ।
माथिल्लो तामाकोसीपछि कारोबारका आधारमा नबिल बैंक दोस्रो स्थानमा रह्यो। बैंकको मूल्य ३.८ प्रतिशतले बढेर प्रतिकित्ता १२७८ रुपैयाँ पुगेको छ।
