यो एक साता नेप्से परिसूचक खासै फरक परेको छैन। साताको पहिलो दिन आइतबार बजार खुल्दा नेप्से परिसूचक १०५.५५ अंकले बढेर २८८५.५३ विन्दुमा पुगेको थियो। बिहीबार बजार बन्द हुँदा परिसूचक घटेर २८७६.७५ पुगेको थियो।
पहिलो दिन नेप्से अघिल्लो साताको तुलनामा उच्च अंकले बढे पनि समग्र सातामा खासै उतारचढाव भएन। आइतबार १०५ अंकले बढेको परिसूचक सोमबार १३.४८ अंकले घटेर २८७२.०५ पुगेको थियो।
त्यस्तै, मंगलबार भने सेयर बजार परिसूचक १९.२९ अंकले बढेर २८९१.३३ पुग्यो। बुधबार सरकारले सार्वजनिक बिदा दिएकाले बजार बन्द रह्यो। बिहीबार भने सेयर बजार पुनः घटेर २८७६.७५ पुगेको हो।
साताको पहिलो दिन २३१ कम्पनीको कारोबार भएको थियो। सोमबार यो संख्या घटेर जम्मा २२५ कम्पनीको कारोबार भयो भने मंगलबार २२३ वटा कम्पनीहरू कारोबारमा आए। त्यस्तै, बिहीबार भने २२४ कम्पनीको सेयर किनबेच भयो।
साताको पहिलो दिन आइतबार ६ अर्ब ३२ करोडको कारोबार भएको थियो। यो साताको बजार बन्दा हुँदा बिहीबार कारोबार रकम २ अर्ब २९ करोड बढेर ८ अर्ब ६१ करोड पुग्यो।
सोमबार बजार घटेका कारण कारोबार रकम ५ अर्ब १५ करोड थियो। त्यस्तै, मंगलबार नेप्से उकालो लागेपछि ६ अर्ब ५७ करोडको कारोबार भयो। बिहीबार ८ अर्ब ६१ करोडमा कारोबार भएर बजार बन्द भयो।
साताभर कारोबारमा आएका कम्पनीमध्ये चारै दिन विन लघुवित्त वित्तीय संस्थाको सेयर १० प्रतिशतले बढेको छ। त्यस्तै, बुद्धभूमि नेपाल हाइड्रोपावरको सेयर आइतबार, सोमबार र मंगलबार ९.९९ प्रतिशतले बढ्यो भने बिहीबार ९.७३ प्रतिशतले बढेको छ।
नेपाल स्टक एक्सचेन्जका अनुसार साताभरिमा धेरै कारोबार भएका कम्पनीमध्ये अपी पावर, एनटिसी, हाइड्रो इलेक्ट्रिसिटी इन्भेस्टमेन्ट एन्ड डेभलपमेन्ट, अरुण भ्याली हाइड्रोपावर, अपर तामाकोशी हाइड्रोपावर, जीवन विकास लघुवित्त वित्तीय संस्था, नेसनल हाइड्रोपावर कम्पनी, हाइड्रो इलेक्ट्रिसिटी एन्ड डेभलपमेन्ट बैंक, शिखर इन्स्योरेन्स लगायत छन्।
