नेपाल लाइफ इन्स्योरेन्स कम्पनीले बजारको माग र आवश्यकताअनुसार विभिन्न विशेषताहरू सहितको जीवन बीमा योजनाहरू ल्याउने गरेको छ। यसै सन्दर्भमा नेपाल लाइफले 'नेपाल लाइफ आईइन्स्योर' जीवन बीमा योजना ल्याएको छ।
उक्त योजना अनुरुप न्यून लगानीमा अधिक जोखिम बहन हुनुका साथै व्यक्तिले गरेको लगानीको पनि सुनिश्चतता हुने इन्स्योरेन्स कम्पनीले जनाएको छ।
विशेषताहरूः
नेपाल लाइफ आईइन्स्योर जीवन बीमा योजना मुनाफामा सरिक नहुने म्यादी जीवन बीमा योजना हो। १८ वर्षदेखि ६० वर्ष उमेर समूहका व्यक्ति यो जीवन योजनामा सामेल हुन सक्नेछन्। न्यूनतम ५ वर्षदेखि अधिकतम २५ वर्षसम्मको बीमा अवधि लिन सकिने आईइन्स्योर जीवन बीमामा बीमा समाप्ति अधिकतम उमेर भने ६५ वर्ष कायम गरिएको छ। आफ्नो आम्दानी वा सुविधाका आधारमा वार्षिक, अर्ध-वार्षिक, त्रैमासिक, मासिक र एक मुस्ठ तरिकाले बीमा शुल्क भुक्तानी गर्न सकिनेछ। न्यूनतम बीमाङ्क रकम एक लाख रुपैयाँदेखि अधिकतम बीमाङ्क रकम एक करोड रुपैयाँ सम्मको बीमा गर्न सकिनेछ।
यस योजनामा समावेश भएका सुविधाहरूः
बीमा शुल्क तिर्ने तरिका अनुसार छुट वा थप शुल्कको व्यवस्था गरिएको छ। जसअनुसार वार्षिक बीमा शुल्क भुक्तानी तरिका छनौट गर्दा १ प्रतिशत छुट, अर्ध-वार्षिक बीमा शुल्क भुक्तानी तरिका छनौट गर्दा छैन, त्रैमासिक बीमा शुल्क भुक्तानी तरिका छनौट गर्दा ३ प्रतिशत थप र मासिक बीमा शुल्क भुक्तानी तरिका छनौट गदा ६ प्रतिशत थप शुल्क लाग्नेछ। त्यसैगरी बीमाङ्कको आधारमा समेत छुटको व्यवस्था गरिएको छ। २५ लाख रुपैयाँसम्मको बीमाङ्कमा छुटको व्यवस्था छैन भने सोभन्दा माथि बीमाङ्कको बीमा शुल्कमा १ प्रतिशत छुटको व्यवस्था गरिएको छ।
समर्पण तथा कर्जा सुविधाः
वार्षिक ३ किस्ता बीमा शुल्क भुक्तानी गर्नुको साथै बीमा प्रारम्भ मितिबाट ३ वर्ष पुरा भए पश्चात समर्पण मूल्य प्राप्त गर्न सकिनेछ। तर यस जीवन बीमा योजनामा कर्जा सुविधा भने उपलब्ध छैन।
दुर्घटना मृत्यु लाभ सुविधा (ऐच्छिक)ः
१८ वर्षदेखिका बीमितले अतिरिक्त बीमा शुल्क तिरेर बीमाङ्क रकम बराबर अधिकतम एक करोड रुपैयाँसम्मको दुर्घटना मृत्यु लाभ ऐच्छिक सुविधा लिन सक्नेछन्।
बीमाङ्क रकम भुक्तानी पाउने अवस्थाहरू
पूर्ण अवधि भुक्तानीः
बीमालेख चालु रही बीमा अवधि भुक्तानी पश्चातसम्म बीमित जीवित रहेमा बीमितले भुक्तानी गरेको बीमा शुल्क बराबरको रकम (ऐच्छिक सुविधा लिनेको हकमा ऐच्छिक सुविधा बापत तिरेको रकम बाहेक) बीमितलाई फिर्ता गरिने छ।
मृत्यु दाबी भुक्तानीः
बीमालेख चालु भएको एक वर्षभित्र दुर्घटना बाहेक अन्य जुनसुकै कारणबाट (बीमालेख अन्तर्गत नपर्ने जोखिमहरू बाहेक) बीमितको मृत्यु भएमा बीमीतले भुक्तानी गरेको बीमा शुल्क रकम मात्र फिर्ता पाउनेछ।
बीमालेख चालु भएको एक वर्ष भित्र दुर्घटनाको कारणबाट (बीमालेख अन्तर्गत नपर्ने जोखिमहरू बाहेक) बीमितको मृत्यु भएमा बीमाङ्क रकम भुक्तानी गरिनेछ।
बीमालेख चालु भएको एक वर्ष पश्चात बीमा अवधि भित्र जुनसुकै कारणबाट (बीमालेख अन्तर्गत नपर्ने जोखिमहरू बाहेक) बीमितको मृत्यु भएमा बीमाङ्क रकम भुक्तानी गरिनेछ ।
यदि दुर्घटना मृत्यु लाभ सुविधा लिएको बीमालेखमा बीमितको दुर्घटनाको कारणबाट मृत्यु भएमा बीमालेखमा उल्लेख भएको बीमाङ्क रकम तथा दुर्घटना मृत्यु लाभ सुविधा बापतकोे बीमाङ्क रकम एकमुष्ट भुक्तानी दिइनेछ।
