मंगलबार सेयर बजार बढेको छ। आज सेयर बजारको परिसूचक १७.४२ अंकले बढेर २,७३५.९३ पुगेको हो।
दिनभरमा जम्मा २२८ कम्पनीको ६० लाख ८१ हजार ६०२ सेयर किनबेच हुँदा ३ अर्ब २१ करोड २८ लाख ८७ हजार ८२२ रुपैयाँ १२ पैसाको कारोबार भएको छ।
कारोबार भएका कुल कम्पनीमध्ये १३१ कम्पनीको मूल्य बढेको छ भने ५० कम्पनीको मूल्य घटेको छ। बाँकी १० कम्पनीको मूल्य स्थिर छ।
आज कारोबारमा आएका १३ वटा उपसमूहहरूमध्ये म्यानुफ्याक्चर एन्ड प्रडक्सन र इनभेस्टमेन्टबाहेक बाँकी सबै उपसमूहको सूचक सकारात्मक देखिएको छ। उपसमूहमध्ये अन्यको १.९८ प्रतिशतले कारोबार बढेको छ। त्यस्तै, फाइन्यान्सको १.९१ प्रतिशत, विकास बैंकको १.५१ र नन-लाइफ इन्स्योरेन्सको १.०५ प्रतिशतले सेयर कारोबार बढेको छ। यसबाहेक अन्य उपसमूहरहरूको सूचक १ प्रतिशतभन्दा कमले मात्रै बढेको हो।
मंगलबार मैलुङ खोला जलविद्युत कम्पनीको सेयर १० प्रतिशतले बढेको छ। त्यस्तै, युनाइटेड आइडिबी मार्दी आरबी हाइड्रोपावरको सेयर ९.९९ प्रतिशत र सामलिङ पावर कम्पनीको ८.५२ प्रतिशतले सेयर बढेको छ। बाँकी कम्पनीको सेयर भने ७ प्रतिशतभन्दा कमले बढेको छ।
नेपाल स्टक एक्सचेन्जकाअनुसार मंगलबार एनटिसीको सबैभन्दा धेरै सेयर कारोबार भएको छ। कम्पनीको २१ करोड ४९ लाख ६७ हजार ४२१ रुपैयाँ २० पैसाको कारोबार भएको हो।
यसपछि, अरुन भ्याली हाइड्रोपावर डिभलपमेन्टको १२ करोड ७८ लाख १९ हजार ६४९ रुपैयाँ ६० पैसा, जीवन विकास लघुवित्त वित्तीय संस्थाको ११ करोड २२ लाख ६२ हजार ५२८ रुपैयाँ ८० पैसा, हिमालयन डिस्टिलरीको १० करोड ४१ लाख ८८ हजार ५०६ रुपैयाँ २० पैसा र आइसिएफसी फाइन्यान्सको १० करोड २९ लाख ३३ हजार ७४४ रुपैयाँ ४० पैसाको कारोबार भएको छ।
