मंगलबार सेयर बजार बढेको छ। आज सेयर बजारको परिसूचक १६.४ अंकले बढेर २,६५०.७० पुगेको हो।
दिनभरमा जम्मा २३५ कम्पनीको ५३ लाख २९ हजार ९९३ सेयर किनबेच हुँदा २ अर्ब ५१ करोड ८८ लाख ९४ हजार १७८ रुपैयाँ ३० पैसाको कारोबार भएको छ।
कारोबार भएका कुल कम्पनीमध्ये १०६ कम्पनीको मूल्य बढेको छ भने ७७ कम्पनीको मूल्य घटेको छ। बाँकी १० कम्पनीको मूल्य स्थिर छ।
आज कारोबारमा आएका १३ वटा उपसमूहहरूमध्ये ट्रेडिङको बाहेक सबै उपसमूहको सूचक सकारात्मक देखिएको छ। ट्रेडिङको परिसूचक १.४ प्रतिशतले घटेको हो।
मंगलबार इमर्जिङ नेपाल लिमिटेडको सेयर ९.९९ प्रतिशतले बढेको छ। राष्ट्र उत्थान लघुवित्त संस्थाको सेयर ६.९ प्रतिशत र नेपाल लाइफ इन्स्योरेन्सको ५.१८ प्रतिशतले बढेको छ। बाँकी कम्पनीको सेयर भने ५ प्रतिशतभन्दा कमले मात्रै बढेको छ।
नेपाल स्टक एक्सचेन्जकाअनुसार आज प्रभु इन्स्योरेन्स कम्पनीको सबैभन्दा धेरै सेयर कारोबार भएको छ। कम्पनीको १५ करोड ३३ लाख ४० हजार रुपैयाँको कारोबार भएको हो।
यसपछि, एनटिसीको १० करोड ७१ लाख ९६ हजार ५६४ रुपैयाँ, शिवम् सिमेन्टको ८ करोड ६२ लाख ३७ हजार ७३८ रुपैयाँ १० पैसा, ज्योति विकास बैंकको ८ करोड १८ लाख ८३ हजार ३२६ रुपैयाँ ४० पैसा र जीवन विकास लघुवित्त वित्तीय संस्थाको ८ करोड ५ लाख ५२ हजार ७७१ रुपैयाँ २० पैसाको कारोबार भएको छ।
