सिद्धार्थ बैंकले बुधबार विराटनगरमा आफ्नै नवनिर्मित भवनमा बैंकको प्रदेश १ क्षेत्रीय कार्यालयको उद्घाटन गरेको छ। उक्त भवनको उद्घाटन बैंकका सञ्चालक समितिका अध्यक्ष मनोज कुमार केडियाले गरेका हुन्। भवनको उद्घाटन समारोहमा उद्योगी, व्यापारी तथा विभिन्न संघ-संस्थाका प्रमुख अगुवाहरूको उपस्थिति थियो।
विभिन्न वर्गका ग्राहकहरू, व्यापारी तथा उद्योगीहरूमाझ उच्चस्तरीय बैंकिङ सेवा प्रदान गर्ने उद्देश्यका साथ उक्त कार्यालयको निर्माण गरिएको हो। अत्याधुनिक प्रविधिमैत्री बैंकिङ मार्फत ग्राहकहरू समक्ष सेवा प्रदान गर्ने उद्देश्यका साथ भवन निर्माण गरिएको बैंकद्वारा जारी विज्ञप्तिमा उल्लेख छ।
बैंकले यसअघि विराटनगर स्थित वडा नं ७ मेनरोडबाट सेवा प्रदान गर्दै आइरहेको विराटनगर शाखालाई समेत उक्त भवनमा स्थानान्तरण गरिएको छ।
हाल सिद्धार्थ बैंकले देशभर १९० वटा शाखा (४ एक्स्टेन्सन काउन्टर सहित), २०८ वटा एटिएम, ११४ शाखारहित बैंकिङ सेवा र १,५०० भन्दा बढी पिओएस् मेसिन मार्फत बैंकिङ सेवा प्रदान गर्दैछ।
