सिद्धार्थ बैंकले कोशी अस्पतालसँग हेमोडाउलासिस मेसिन प्रदान गर्ने विषयमा सम्झौता गरेको छ।
गत बुधबार विराटनगरस्थित कोशी अस्पताललाई आफ्नो सामाजिक उत्तरदायित्व अन्तर्गत ५० लाख रुपैयाँ बराबरको अस्पतालले उपलब्ध गराएको विवरण बमोजिम हेमोडायलाइसीस मेसिनहरू प्रदान गर्न अस्पतालसँग सम्झौता गरेको हो।
उक्त सम्झौता पत्रमा सिद्धार्थ बैंकका तर्फबाट बैंकका प्रमुख कार्यकारी अधिकृत सुन्दर प्रसाद कडेल र कोशी अस्पतालका तर्फबाट मेडिकल सुपरिटेन्डेन्ट डा. यज्ञराज खरेलले हस्ताक्षर गरेका हुन्।
कोशी अस्पतालले उक्त हेमोडायलाइसिस मेसिन अस्पतालमा आउने विरामीहरूको उपचारको लागि प्रयोग गर्नेछ। बैंकले पुर्याएको सो सहयोगबाट मिर्गौला रोग भएका व्यक्तिहरूलाई डायलाइसिस सेवा प्रदान गरी जीवनस्तर सुधार गर्न केहि हदसम्म मद्दत पुग्ने विश्वास बैंकले लिएको छ।
बैंकले विभिन्न सामाजिक उत्तरदायित्व निर्वाह सम्बन्धी कार्यहरूमा सहभागिता जनाउँदै आएको छ भने आगामी दिनहरूमा पनि यस्ता संस्थागत सामाजिक उत्तरदायित्वलाई सधैं आफ्नो उच्च प्राथमिकतामा राखी निरन्तरता दिँदै जाने उद्देश्य राखेको छ ।
