सिद्धार्थ बैंक र हेफर इन्टरनेशनल नेपालबीच महिला उद्यमी तथा साना किसानहरूलाई सुलभ वित्तीय कर्जा उपलब्ध गराउने विषयमा सम्झौता भएको छ।
सम्झौता पत्रमा बैंकका तर्फबाट प्रमुख कार्यकारी अधिकृत सुन्दर प्रसाद कडेल र हेफर नेपालका तर्फबाट राष्ट्रिय निर्देशक डा. शुभ नारायण महतोले हस्ताक्षर गरेका हुन्।
सम्झौता अनुसार पशुपालन सम्बन्धी कृषि क्षेत्रहरू जस्तै बाख्रापालन, पशुपालन तथा तरकारी लगायतका मूल्य शृंखलाहरूमा संलग्न महिला उद्यमी तथा साना किसानहरूलाई सहज ढंगले अनुदानमा आधारित वित्तिय कर्जा उपलब्ध गराइने छ। सो साझेदारीको मुख्य उद्देश्य, महिला उद्यमी तथा साना किसानहरूको व्यवसाय विस्तार गर्ने क्षमताको मूल्यांकन र विकाशमा केन्द्रीत रहनु बैंकद्वारा जारी विज्ञप्तिमा उल्लेख छ।
उक्त योजनामा हेफर नेपालका तर्फबाट सामाजिक उद्यमी महिला सहकारी र स्थानीय सरकार पनि आबद्ध रहेका छन्। महिला सहकारी वा स्थानीय सरकारले उद्यमीहरूको पहिचान र सिफारिसलाई बैंकसँग जोड्न सहज बनाउने छ।
साथै, समाजमा उच्चस्तरीय बैंकिङ सेवा उपलब्ध गराउने उद्देश्यका साथ बैंकले १९० शाखा कार्यालयहरू, ११४ शाखारहित बैंकिङ सेवाबाट उक्त सम्झौता अनुरुप उद्यमीहरूलाई कर्जा उपलब्ध गराउन सहजता प्रदान गर्नेे विश्वास लिएको छ।
