एनआइसी एशिया बैंकले चालू आर्थिक वर्ष २०७८/७९ को तेस्रो त्रैमासको अपरिष्कृत वित्तीय विवरण प्रकाशित गरेको छ।
बैंकले आव २०७८/७९ को तेस्रो त्रैमाससम्ममा कर्जा व्यवसायतर्फ कुल कर्जा रकम रू. २७४.७४ अर्ब पुर्याएको छ। साथै, निक्षेपतर्फ कुल निक्षेप संकलन रू. ३०२.८१ अर्ब पुगेको छ।
बैंकले यस त्रैमासमा खुद मुनाफातर्फ रू. ३.६० अर्ब आर्जन गरेको छ। जुन वार्षिक विन्दुगत आधारमा २० प्रतिशतको वृद्धि हो। यसैगरी, बैंकको स्व-पुँजीमा प्रतिफल २१.४६ प्रतिशत रहेको छ।
बैंकले वार्षिक प्रति सेयर आम्दानी रू. ४१.९४ आर्जन गरेको छ। कोभिड-१९ महामारीमा समेत बैंकले कर्जा असुलीमा निकै उत्साहजनक नतिजा हासिल गर्न सफल भइ निष्कृय कर्जालाई तेस्रो त्रैमाससम्ममा ०.५१ प्रतिशतमा सीमित राख्न बैंक सफल भएको बैंकद्वारा जारी विज्ञप्तिमा उल्लेख छ।
बैंकले आव २०७८/७९ को तेस्रो त्रैमाससम्ममा ९ लाखभन्दा बढी नयाँ खाताहरू थप गर्दै ३७ लाखभन्दा बढी खाताहरू मार्फत ग्राहकहरू माझ सेवा प्रदान गर्दैछ। यसै त्रैमाससम्ममा बैंकले कुल कर्जा लगानीको अंशमा करिब ८६ प्रतिशत साना तथा मझौला र रिटेल प्रकारका रणनीतिक क्षेत्रहरूमा कर्जा विस्तार गरेको छ।
बैंक आव २०७८/७९ को दोस्रो त्रैमासमा कर्जा विस्तार, निक्षेप संकलन, प्रति सेयर आम्दानी, स्व-पुँजीमा प्रतिफल, ग्राहक संख्या, शाखा संख्या, विस्तारित काउन्टर संख्या, एटिएम संख्या, डेबिट कार्ड प्रयोगकर्ता, मोबाइल बैंकिङ प्रयोगकर्ता र सञ्चालन मुनाफा (कर्जा नोक्सानी व्यवस्था अघिको) मा अन्य वाणिज्य बैंकहरूमध्ये पहिलो स्थान (ग्राहक संख्यामा निजी बैंकहरूमा पहिलो)मा छ।
हाल एनआइसी एशिया बैंकले देशभर कुल ३५८ शाखा कार्यालयहरू, ४७३ एटिएम, १०२ वटा विस्तारित काउन्टर एवं ८१ वटा शाखा रहित बैंकिङमार्फत बैंकिङ सेवा प्रदान गर्दैछ।
