उपकार लघुवित्त वित्तीय संस्था लिमिटेडको आइपिओ भोलि बाँडफाँट हुने भएको छ। बिक्री प्रबन्धक नेपाल एसबिआई मर्चेन्ट बैंकिङको प्रांगणमा बिहान ८ बजेदेखि बाँडफाँट कार्यक्रम सुरू हुनेछ।
उपकार लुघवित्तले गत चैत्र २५ गते आइपिओ निष्कासन गरेको थियो। आवदेनका लागि अन्तिम मिति चैत्र ३० गते तोकिएको थियो।
कम्पनीको कुल ६ लाख ५६ हजार २५० सेयर दर्ता गरिएको छ। जसमध्ये लघुवित्तले सर्वसाधारणका लागि प्रतिकित्ता १०० रूपैयाँ अंकित मूल्यमा दुई करोड ३६ लाख २५ हजार रूपैयाँ बराबरको २ लाख ३६ हजार २५० कित्ता साधारण सेयर निष्कासन गरेको हो।
संस्थाले जारी गरेको कुल सेयरमध्ये ०.५ प्रतिशत अर्थात् ३ हजार २८२ सेयर संस्थाको कर्मचारीहरूको लागि र ५ प्रतिशत अर्थात् ११ हजार ८१३ सेयर म्युचुअल फन्डको लागि छुट्याएको छ। यसबाहेक बाँकी २ लाख २१ हजार १५६ कित्ता सेयर सर्वसाधरणको लागि दिइएको हो।
दुई करोड ७५ लाख ६५ हजार २३० सेयर कित्ताको लागि २४ लाख ३१ हजार १७० जनाले आवेदन दिएका छन्। यो भनेको १२४.६४ गुणाले मागभन्दा बढी आवदेन परेको हो।
तर उपकार लघुवित्त वित्तीय संस्थाको आइपिओ जम्मा २२ हजार ११५ जना आवेदकले मात्रै पाउनेछन्। जुन भनेको प्रत्येक ११० जना आवेदकमध्ये एक जनाले पाउने भएको हो।
