सिवाइसी लघुवित्त वित्तीय संस्था लिमिटेडको आइपिओ बिहीबार बाँडफाँट हुने भएको छ। बिक्री प्रबन्धक ग्लोबल आइएमई क्यापिटल, नक्सालमा बिहान ९ बजेदेखि बाँडफाँट कार्यक्रम सुरू हुनेछ।
लघुवित्तले गत वैशाख २ गतेदेखि वैशाख ६ गतेसम्मको लागि आइपिओ खुलाएको थियो। यसले ३ करोड ९५ लाख ३३ हजार ६०० रुपैयाँ बराबरको ३ लाख ९५ हजार ३३६ कित्ता आइपिओ जारी गरेको हो।
सिवाइसी नेपालले निष्काशन गर्न लागेको कुल ३ लाख ९५ हजार ३३६ कित्ता सेयरमध्ये जारी पूँजीको ०.५ प्रतिशत अर्थात ६ हजार ८२ कित्ता कर्मचारीका लागि र ५ प्रतिशत अर्थात १९ हजार ७६६ कित्ता सामूहिक लगानी कोषलाई सुरक्षित गरेको छ। सर्वसाधारणले बाँकी रहेको ३ लाख ६९ हजार ४८८ कित्ता सेयरका लागि आवेदन दिएका हुन्।
दुई करोड ५६ लाख ८८ हजार ४५० सेयर कित्ताको लागि २२ लाख ७७ हजार ७४३ जनाले आवेदन दिएका छन्। यो भनेको ६९.५२ गुणाले मागभन्दा बढी आवदेन परेको हो। तर सिवाइसी नेपाल लघुवित्तको जम्मा ३६ हजार ९४८ जना आवेदकले मात्रै १०-१० कित्ता सेयर पाउनेछन्।
सिवाइसी नेपाल लघुवित्त वित्तीय संस्था २०७५ असार १७ गते कम्पनी राजिष्टारको कार्यालयमा पब्लिक लिमिटेड कम्पनीको रुपमा दर्ता भएको हो। कम्पनीले २०७५ माघ २८ गते नेपाल राष्ट्र बैंकबाट घ वर्गको वित्तीय संस्थाको रुपमा कारोबार गर्न अनुमति पाएको थियो।
आइपिओ निष्काशनका लागि गराएको क्रेडिट रेटिङ्गमा केयर रेटिङ्गस नेपालले लघुवित्तलाई केयर एनपी डबल बि माइनस इस्यूअर रेटिङ्ग प्रदान गरेको छ। यसले समयमै वित्तीय दायित्व पुरा गर्न सक्ने सम्बन्धमा मध्यम जोखिम रहेको संकेत गर्दछ।
हाल लघुवित्तको चुक्ता पूँजी ८ करोड २१ लाख ८ हजार २४० रुपैयाँ छ। आइपिओ बाँडफाँटपश्चात लघुवित्तको चुक्ता पूँजी १२ करोड १६ लाख ४१ हजार ८४० रुपैयाँ पुग्नेछ।
