बीमा समितिले कम्पनीहरूलाई चुक्ता पुँजी वृद्धिको निर्देशन दिएलगत्तै हिमालयन जनरल इन्स्योरेन्स र एभरेष्ट इन्स्योरेन्स मर्जरमा जान लागेका छन्।
यी कम्पनीहरूले एक आपासमा मर्जरमा जान बीमा समितिबाट सैद्धान्तिक सहमित पाएका छन्। बीमा समितिले आगामी चैत मसान्त भित्र जीवन बीमा कम्पनीले पाँच अर्ब पुर्याउनु पर्ने र निजीर्वन बीमा कम्पनीहरूलाई दुई अर्ब ५० करोड पुँजी पुर्याउन निर्देशन दिएको छ।
हिमालयन र एभरेष्ट इन्स्योरेन्स मर्जरमा गएमा यो क्षेत्रमा यो पहिलो घटना हुनेछ। यसअघि हिमालयन र सगरमाथा इन्स्योरेन्सबीच मर्जर हुने सम्भावनाका खबर पनि बाहिरीएको थियो। तर, सम्भव भएन।
कम्पनीहरूले प्रकाशित गरेको दोस्रो त्रैमासिक वित्तीय विवरण अनुसार हिमालयनको चुक्ता पुँजी एक अर्ब १० करोड र एभरेष्टको एक अर्ब १८ करोड रूपैयाँ छ। कम्पनीहरू एक बराबर एक अनुपातमा मर्ज भएमा दुई अर्ब २८ करोड पुँजी पुग्नेछ।
कम्पनीहरूले हकप्रदबाट सेयर जारी गर्न सक्ने भएपनि यही एउटा विकल्पबाट मात्र पुँजी पुर्याउन नपाइने बीमा समितिले बताउँदै आएको छ। तोकिएको समयमा पुँजी पुर्याउन नसक्ने कम्पनीहरूलाई पनि थप समय भने नदिइने समीतिले स्पष्ट पारेको छ।
हाल १९ जीवन बीमा कम्पनी सञ्चालनमा भन् भने २० निर्जीवन बीमा कम्पनी सञ्चालनमा छन्। जीवन बीमा कम्पनीमा ७ वटाले भने हालसम्म सर्वसाधारणमा सेयर जारी गरेका छैनन्।
बाँकीमध्ये ११ वटा जीवन बीमा कम्पनीको पुँजी हाल तोकिए अनुसार पुगेको छैन। यो समूहको नेपाल लाइफ इन्स्योरेन्सको मात्रै पुँजी पुगेको छ। नेपाल लाइफको पुँजी सात अर्ब १९ करोड छ। अधिकांशले दोब्बरले पुँजी बढाउनु पर्ने देखिन्छ।
त्यस्तै, निर्जीवन कम्पनीहरूमा भने कुनैको पनि चुक्ता पुँजी दुई अर्ब ५० करोड पुगेको छैन। शिखर इन्स्योरेन्सको सबैभन्दा धेरै एक अर्ब ७५ करोड पुँजी पुगेको छ। कम्पनीले मर्जरमा नगई पुँजी पुर्याउन सक्ने जानकारी बीमा समितिलाई गराएको छ। सीमितिको निर्देशन अनुसार पुँजी पुर्याउन निर्जीवन कम्पनीहरूमा लगभग सबैको पुँजी दोब्बरले बढाउँनु पर्ने हुन्छ।
