नेपाल स्टक एक्सचेन्ज जेठ १ गतेदेखि शुक्रबार पनि खुल्ने भएको छ। सरकारले दुई दिन सार्वजनिक बिदा दिने घोषणा गरेसँगै शुक्रबार पनि सेयर बजार खुल्ने भएको हो।
अब सोमबारदेखि शुक्रबारसम्म नियमित कारोबार हुने भएको छ। कारोबारको समयावधि भने परिवर्तन गरिएको छैन। यी कारोबार दिनमा बिहान ११ बजेदेखि ३ बजेसम्म बजार खुला रहनेछ।
सेयर खरिद-बिक्री केन्द्रबाट वि. सं. २०५० मा नेपाल स्टक एक्सचेन्जको रुपमा रुपान्तरण भएसँगै सेयर बजार ५ दिन खुला रहने गरेको थियो। सुरूमा दैनिक दुई घण्टा कारोबार हुने बजार हाल दैनिक ४ घण्टा खुला रहने गरेको छ।
यसअघि अन्य दिन एक पटकमा न्यूनतम १० कित्ता सेयर कारोबार गर्न सकिने र शुक्रबार भने सोभन्दा कम सेयरको पनि कारोबार गर्न सकिने व्यवस्था थियो। तर २०७३ यता भने नियमित कारोबारमै १ कित्तासम्म सेयर किन्न सकिने व्यवस्था भएसँगै शुक्रबार अडलट कारोबार हुन छाडेको थियो।
