आदर्श लघुवित्त वित्तीय संस्था लिमिटेडले सर्वसाधारणका लागि आइपिओ निष्कासन गर्ने भएको छ। कम्पनीले आउँदो असार १ गतेदेखि ६७ हजार कित्ता सेयर जारी गर्ने भएको हो।
आवेदकहरूले प्रति कित्ता एक सय रूपैयाँको दरमा न्यूनतम १० कित्ता सेयर र अधिकतम एक हजार कित्तासम्म भर्न सक्नेछन्। आवेदन छिटोमा असार ६ गतेसम्म दिन सकिनेछ। माग बमोजिमको आवेदन नपरेमा भने ढिलोमा असार १५ गतेसम्म आवेदन दिन सकिनेछ।
जारी गरिएको कित्तामध्ये कम्पनीले ०.५ प्रतिशत अर्थात् १ हजार ३५ कित्ता सेयर कर्मचारीहरूको लागि र ५ प्रतिशत अर्थात् ३ हजार ३५० कित्ता सेयर सामुहिक लगानी कोषको लागि छुट्याएको छ। यीबाहेक बाँकी ६२ हजार ६१५ सय कित्ता सेयर सर्वसाधारणको लागि जारी हुनेछ। आइपिओ जारी भएसँगै कम्पनीको चुक्ता पुँजी २ करोड ७ लाख पुग्ने बताइएको छ।
कम्पनीको धितोपत्र निष्कासन तथा बिक्री प्रबन्धक बैंक अफ काठमाण्डू रहेको छ। आदर्श लघुवित्तलाई केयर रेटिङ नेपालले बि प्लस ग्रेडिङ दिएको छ।
आदर्श लघुवित्त वित्तीय संस्था लिमिटेड एक 'घ' वर्गको प्रदेश स्तरीय लघुवित्त संस्था हो। यसले बागमती प्रदेशको १३ जिल्लामा मात्रै सञ्चालन अनुमति पाएको छ। लघुवित्त सन् २०१८ मे २३ मा समावेश गरिएको भएपनि सन् २०१९ को जनवरीबाट सञ्चालनमा आएको हो।
