बिहीबार सेयर बजार १७.६४ अंकले घटेर २,०६२.८० बिन्दुमा पुगेको छ। लगातार ८ दिन ओरालो लागेको बजार बुधबार बढेको थियो। अघिल्लो दिन नेप्से परिसूचक ६०.२२ अंकले बढेर २,०८०.४४ बिन्दुमा पुगेको थियो।
बुधबार सबै नियामक निकायहरू सेयर बजारप्रति सकारात्मक भएको सन्देश प्रभाव भइरहँदा बजार वृद्धिको दिशामा गएको थियो।
अर्थ मन्त्रालयको पहलमा चार सदस्य समिति गठन गरेको छ। यो समितिका सिफारिसहरू आउन केही समय लाग्ने भएपछि पनि यसको तत्काल प्रभाव बजारमा नदेखिएको हो। अहिलेलाई बैंकमा रहेको तरलता अभावको समस्या नै बजारलाई प्रभाव पार्ने मुख्य कारक बनिरहेको छ।
आज बजार घटेसँगै कारोबार रकम पनि घटेको छ। बिहीबार कुल २२९ किसिमका धितोपत्र तथा ऋणपत्रको ४१ लाख ५६ हजार १०४ सेयर किनबेच हुँदा एक अर्ब ४७ करोड २६ लाख ९० हजार रूपैयाँको कारोबार भएको छ। अघिल्लो दिन भने कारोबार रकम एक अर्ब ६४ करोड ३ लाख ५६ हजार रूपैयाँ पुगेको थियो।
बिहीबार ४४ धितोपत्र तथा ऋणपत्रको मूल्य बढेको छ भने १७६ वटाको मूल्य घटेको छ। आज उपकार लघुवित्त वित्तीय संस्थाको सेयर मूल्यमा सकारात्मक सर्किट ब्रेक लागेको छ। अघिल्लो दिन पनि संस्थाको सेयरमा सकारात्मक सर्किट ब्रेक लागेको थियो। यसपछि आज बलेफी हाइड्रोपावरको ९.९९ प्रतिशतले बढेको हो।
आज कारोबारमा आएका १३ उपसमूहहरूमध्ये ट्रेडिङको बाहेक सबैको मूल्य घटेको छ। ट्रेडिङको पनि जम्मा ०.१२ प्रतिशतले बढेको हो। आज सबैभन्दा धेरै घट्नेमा फाइनान्सको २.३ प्रतिशत, विकास बैंकको २.०२ प्रतिशत र हाइड्रोपावरको १.६५ प्रतिशत रहेको छ।
कारोबार रकमको आधारमा आज सबैभन्दा धेरै कुमारी बैंकको ६ करोड ७४ लाख ६९ हजार रूपैयाँको सेयर कारोबार भएको छ।
यसपछि हिमालयन डिस्टिलरीको ४ करोड ३२ लाख २२ हजार रूपैयाँ, अरुण-काबेली पावरको ३ करोड ९८ लाख ९२ हजार रूपैयाँ, एशियन लाइफ इन्स्योरेन्सको ३ करोड ९८ लाख ८० हजार रूपैयाँ र नेपाल लाइफ इन्स्योरेन्सको ३ करोड ९५ लाख ७२ हजार रूपैयाँको कारोबार भएको छ।
