लगातार ओरालो लागेको सेयर बजार बिहीबार बढेको छ। आज नेप्से परिसूचक १२.५७ अंकले बढेर १,९७८.९४ बिन्दुमा पुगेको हो।
नेप्से बढेपनि अघिल्लो दिनको तुलनामा आज कारोबार रकम घटेको छ। बिहीबार कुल २२१ किसिमका धितोपत्र तथा ऋणपत्रको ३५ लाख ९४ हजार ५९४ सेयर किनबेच हुँदा एक अर्ब १८ करोड ७१ लाख ४५ हजार रुपैयाँको कारोबार भएको छ। बुधबार भने कारोबार रकम एक अर्ब ४९ करोड १७ लाख ५८ हजार रुपैयाँ पुगेको थियो।
राष्ट्र बैंकले सेयर धितोमा एकल ग्राहक कर्जा सीमा परिमार्जनसहित लागू गर्ने सम्भावनाका हल्लाहरू चलेकोले पनि आज बजार बढ्न सहयोग पुगेको देखिन्छ।
आज कारोबारमा आएका १३ उपसमूहहरूमध्ये लाइफ इन्स्योरेन्स र इनभेस्टमेन्टबाहेक सबैको मूल्य बढेको छ। लाइफ इन्स्योरेन्सको पनि जम्मा ०.०४ प्रतिशत र इनभेस्टमेन्टको ०.१ प्रतिशतले घटेको हो। यीबाहेक आज सबैभन्दा धेरै अन्यको २.८१ प्रतिशत र ट्रेडिङको १.४८ प्रतिशतले बढेको छ।
बिहीबार कुल १५२ धितोपत्र तथा ऋणपत्रको मूल्य बढेको छ भने ५२ वटाको मूल्य घटेको छ। आँधीखोला लघुवित्त वित्तीय संस्थाको मूल्य वृद्धिमा आज सकारात्मक सर्किट ब्रेक लागेको छ। यसपछि रिभर फल्स पावर लिमिटेडको ९.९७ प्रतिशत र सामुदायिक लघुवित्त वित्तीय संस्थाको ९.९६ प्रतिशतले बढेको छ।
रिभर फल्स पावर लिमिटेडको सेयर कारोबार बिहीबारदेखि सुरू भएको हो। कम्पनीले पहिलो कारोबारको लागि ८७ रुपैयाँ ९८ पैसादेखि २६३ रुपैयाँ ९४ पैसाको मूल्य रेन्ज पाएको थियो। कम्पनीहरूको नेटवर्थको अधिकतम तीन गुणासम्म मूल्य रेन्ज दिइन्छ। बिहीकार कम्पनीको पहिलो कारोबार २६३ रुपैयाँ ९० पैसाबाट बढेर २९० रुपैयाँ २० पैसासम्म पुगेको छ।
कारोबार रकमको आधारमा आज सबैभन्दा धेरै एनटिसीको १३ करोड ८८ लाख ९७ हजार रुपैयाँको सेयर कारोबार भएको छ।
यसपछि नेपाल क्रेडिट एन्ड कमर्सियल बैंकको १० करोड ३५ लाख ४ हजार रुपैयाँ, सिभिल बैंकको ४ करोड ७१ लाख १९ हजार रुपैयाँ, एनआइसी एसिया बैंकको ३ करोड ५७ लाख २३ हजार रुपैयाँ र नबिल बैंकको २ करोड ५० लाख ४६ हजार रुपैयाँको कारोबार भएको छ।
