नेपाल धितोपत्र बोर्डका कामु कार्यकारी अधिकृत विनयदेव आचार्यको संयोजकत्वमा बजार सुधार समिति बन्ने क्रममा छ। यद्यपि समितिमा राष्ट्र बैंकबाट कुनै नाम सिफारिस नभएकोले यसले पूर्णता भने पाएको छैन।
‘हामीले राष्ट्र बैंकसँग नाम मागि रहेका छौं,’ बोर्ड स्रोतले भन्यो ,‘सम्भवतः आजै हामी समितिलाई पूर्णता दिनेछौं।’
केही दिन अघि नेपाल धितोपत्र बोर्डको वार्षिकोत्सव कार्यक्रममा अर्थमन्त्री जर्नादन शर्माले बोर्डको कार्यकारी निर्देशकको नेतृत्वमा यस्तो समिति बनिसकेको बताएका थिए।
कामु कार्यकारी अधिकृत आचार्यले हाल बोर्डमा अध्यक्षको अनुपस्थितिमा दैनिक आन्तरिक कामकारवाही हेर्ने जिम्मेवारी पाएका छन्। यही कारण उनीलाई नै यस्तो कमिटी बनाउने र यसको संयोजकत्व तोकिएको छ। बोर्ड अध्यक्ष भने हाल वैदेशिक भ्रमणमा छन्।
तर, मन्त्री शर्माले भने जस्तै कार्यकारी निर्देशककै नेतृत्वमा संयोजक तोकिने भएमा अचार्यले यसको नेतृत्व गर्न पाउने सम्भावना पनि कम छ। हालै धितोपत्र बोर्डबाट कार्यकारी निर्देशकको पदबाट निरज गिरीले अवकाश पाएसँगै यो पद नै खाली छ।
समितिको सदस्यमा धितोपत्र बोर्डबाटै एकजना रहने भनिएको छ। यद्यपि यो सदस्यको पनि यकिन हुन भने बाँकी छ। अर्थमन्त्रालयबाट पनि एक जना सदस्य रहने बताइएको थियो।
अर्थबाट उपसचिव इन्द्रबहादुर देवकोटा सदस्य तोकिएका छन्। उनी अर्थमन्त्रालयमा वित्तीय क्षेत्र व्यवस्थापन तथा संस्थान समन्वय महाशाखामा कार्यरत छन्।
