मंगलबार धितोपत्र बोर्डको नेतृत्वमा सेयर बजार समस्या समाधानका लागि बनेको समितिको पहिलो बैठक बसेको खबरले सेयर बजारमा सुधार देखिन थालेको छ। आज नेप्से परिसूचक ३७.४९ प्रतिशतले बढेर १,९२२.३० बिन्दुमा पुगेको हो।
केही दिनदेखि उच्च दरमा बजार घटिरहेको समय धेरैले लगानी बढाउन थालेकाले पनि सेयर बजारमा सुधार देखिन पुगेको हो। नेप्सेले सोमबार अघिल्लो पटकको उच्च बिन्दु १,८८१ मा टेवा पाएर पनि बढ्न थालेको देखिन्छ।
धितोपत्र बोर्डको नेतृत्वमा बनेको समितिले भर्खंरै काम सुरू गर्न थालेको भएपनि यसको लगानीकर्ताको मनोविज्ञानमा सकारात्मक प्रभाव परेको देखिन्छ। यद्यपि समितिले सुधारका लागि आवश्यक काम कारवाही समेटेको प्रतिवेदन प्रस्तुत गर्न केही समय भने निश्चय नै लाग्ने भएको छ।
मंगलबार सेयर बजार बढेपनि कारोबार रकम घटेको छ। अघिल्लो दिन कारोबार रकम एक अर्ब ७५ करोड ६ लाख रुपैयाँ पुगेको थियो। आज भने कुल २३१ धितोपत्र तथा ऋणपत्रको ३७ लाख ६५ हजार ५१६ सेयर किनबेच हुँदा एक अर्ब २५ करोड ३७ लाख ५७ हजार रुपैयाँको कारोबार भएको छ।
कारोबार भएका धितोपत्र तथा ऋणपत्रमध्ये २१० वटा धितोपत्र तथा ऋणपत्रको मूल्य बढेको छ भने जम्मा १३ वटाको मूल्य घटेको छ। आँधीखोला लघुवित्त वित्तीय संस्था र सिवाइसी नेपाल लघुवित्त वित्तीय संस्थाको मूल्य वृद्धि सबैभन्दा धेरैले भएको हो। यी संस्थाहरूको ९.९९ प्रतिशतले मूल्य वृद्धि भएको हो। यसपछि सप्तकोशी विकास बैंकको ९.९८ प्रतिशतले बढेको छ भने सामुदायिक लघुवित्त वित्तीय संस्थाको ८.९८ प्रतिशतले बढेको छ।
आज कारोबारमा आएका १३ उपसमूहहरूमध्ये सबैको मूल्य बढेको छ। तीमध्ये पनि सबैभन्दा धेरै विकास बैंकको ३.८९ प्रतिशत, फाइनान्सको ३.२९ प्रतिशत र म्युचल फन्डको ३.०९ प्रतिशतले बढेको हो।
कारोबार रकमको आधारमा आज सबैभन्दा धेरै नेपाल टेलिकमको ११ करोड ७२ लाख ९२ हजार रुपैयाँको सेयर कारोबार भएको छ।
यसपछि नबिल बैंकको ४ करोड ३२ लाख ३५ हजार रुपैयाँ, अरुण भ्याली हाइड्रोपावरको ३ करोड ४४ लाख ७७ हजार रुपैयाँ, नेपाल लाइफ इन्स्योरेन्सको ३ करोड २५ लाख २३ हजार रुपैयाँ र एनआइसी एसिया बैंकको ३ करोड १८ लाख ४७ हजार रुपैयाँको कारोबार भएको छ।
