दोर्दी खोला जलविद्युत कम्पनी लिमिटेड (दोर्दी) को आइपिओ बाँडफाँट भएको छ। कम्पनीको सेयर निष्काशन तथा बिक्री प्रबन्धक सिद्धार्थ क्यापिटलले बुधबार आइपिओ बाँडफाँट गरेको हो।
दोर्दी खोला जलविद्युत कम्पनीले गत जेठ २६ गतेदेखि जेठ ३१ गतेसम्म सर्वसाधारणका लागि आइपिओ निष्काशन गरेको थियो। कम्पनीले प्रतिसेयर एक सय रुपैयाँमा २१ लाख ९५ हजार ५०९ कित्ता सेयर जारी गरेको थियो।
यसमध्ये कम्पनीले ३ प्रतिशत अर्थात् ६५ हजार ८६५ कित्ता सेयर कम्पनीको कर्मचारीहरूको लागि र ५ प्रतिशत अर्थात् एक लाख ९ हजार ७७५ कित्ता सेयर सामुहिक लगानी कोषको लागि छुट्याएको थियो। यीबाहेक बाँकी २० लाख १९ हजार ८६९ सय कित्ता सेयर सर्वसाधारणको लागि जारी भएको हो।
कम्पनीका अनुसार आइपिओमा १४ लाख ७० हजार ७८३ जना आवेदकले एक करोड ६३ लाख ८५ हजार ९४० कित्ता सेयरका लागि आवेदन दिएका थिए। यो भनेको ८.११ गुणाले मागभन्दा बढी आवदेन परेको हो।
कम्पनीको आइपिओमा माग भन्दा बढी आवेदन परेकाले गोलाप्रथा विधिबाट २ लाख १ हजार ९८६ जनालाई १० कित्ताका दरले बाँडफाँट गरिएको हो। यसबाहेक ९ जनाले ११ कित्ता सेयर पाए। बाँकी १२ लाख ६८ हजार ७९७ जनाको भने रित्तो हात छ।
आवेदकमध्ये ८८२ जनाको आवेदन रद्द भएको छ, जसले ११ हजार १७० कित्ताको लागि आइपिओ भरेका थिए।
दोर्दी खोला जलविद्युत कम्पनीको आइपिओ नतिजा सिडिएससी आइपिओ रिजल्ट, सिद्धार्थ क्यापिटल र मेरो सेयरबाट हेर्न सकिन्छ।
यसभन्दा अघि कम्पनीले आयोजना प्रभावित लमजुङ जिल्लाका स्थानीयको लागि १० लाख ५४ हजार २६० कित्ता सेयर निष्काशन गरेको थियो।
इक्रा नेपालले दोर्दी खोला जलविद्युत कम्पनीलाई डबल बी माइनस रेटिङ दिएको छ। यसले समयमै वित्तीय दायित्व पूरा गर्न सक्ने जोखिम मध्यम रहेको संकेत गर्छ।
दोर्दी खोला जलविद्युत कम्पनी लिमिटेड नेपालमा जलविद्युत आयोजनाको विकास र लगानी गर्ने उद्देश्यले फागुन १४, २०६६ मा स्थापित सार्वजनिक कम्पनी हो। यसले हाल लमजुङ जिल्लामा १२ मेगावाटको दोर्दी-१ जलविद्युत आयोजना निर्माण गरिरहेको छ।
यसको उत्पादन अनुमति २१०४ पुस ११ गतेसम्म छ। हाल कोभिड-१९ को प्रभावका कारण आयोजनाले व्यावसायिक उत्पान अनुमति मिति बढाइदिन प्राधिकरणलाई पत्रचार गरिहरको छ। २०७७ साउन २ मा आयोजनाले व्यवसायिक उत्पादन थाल्ने लक्क्ष लिएको भएपनि असफल भएको हो।
आयोजनाको औसत ९२.९२ प्रतिशत भौतिक तथा वित्तीय काम सम्पन्न भएको आवहान पत्रमा उल्लेख छ। कम्पनीको संस्थापक सेयरधनीको रूपमा सिइडिभी हाइड्रो, राधी विद्युत, लमजुङ विकास र खारे इन्भेस्टमेन्ट लगायतका कम्पनीहरू छन्।
आयोजना दोर्दी गाउँपालिका-६ लमजुङमा छ। यसको दर्ता कार्यालय काठमाडौं-११, ब्लुस्टार कम्प्लेक्स, त्रिपुरेश्वरमा छ। कम्पनीमा लमजुङ विद्युत विकास कम्पनी लिमिटेडको ८४.९५ प्रतिशत स्वामित्व रहेको छ।
