नेपाली इतिहासमा पहिलो पटक बीमा क्षेत्रमा मर्जर भएको छ। एभरेस्ट इन्स्योरेन्स र हिमालयन जनरल इन्स्योरेन्स कम्पनीबीच मर्जर प्रक्रिया पूरा भएको हो।
यी कम्पनीलाई मंगलबार बीमा समितिले मर्जरको अन्तिम स्वीकृति दिएको छ। एभरेस्ट इन्स्योरेन्सको १ सय कित्ता सेयर बराबर हिमालयन जनरल इस्योरेन्सको ८५ कित्ता ९१ कित्ता हुने गरी अनुपात तय भएको हो।
मर्जरपछि बन्ने नयाँ कम्पनीको नाम 'हिमालयन एभरेष्ट इन्स्योरेन्स लिमिटेड' रहनेछ। कम्पनीले आगामी साउन १ गतेदेखि एकीकृत कारोबार सुरू गर्ने भएको छ।
मर्जरपछि बन्ने कम्पनीको पुँजी करिब २ अर्ब २५ करोड पुग्नेछ। हाल एभरेष्ट इन्स्योरेन्सको चुक्ता पुँजी एक अर्ब २५ करोड र हिमालयनको १ अर्ब १७ करोड रुपैयाँ छ। बीमा समितिले पछिल्लो समय निर्जीवन बीमा कम्पनीहरूलाई २ अर्ब ५० करोड चुक्ता पुँजी पुर्याउँन निर्देशन दिएको छ।
कम्पनीले हाल सेयर स्वाप अनुपात कायम गर्दा उपलब्ध १७ करोड रुपैयाँ प्रिमियमको रुपमा वितरण गर्नेछ। यसबाटै करिब ७.५५ प्रतिशत बोनस दिन सक्ने अवस्थामा कम्पनी छ। पुँजी पुर्याउन कम्पनीलाई थप ८ करोड रुपैयाँ आवश्यक पर्नेछ। थप रकम कम्पनीको नाफापछि बोनस दिन प्रयोग गर्ने उल्लेख छ। मर्जरपछि बन्ने कम्पनीको शाखा संख्या ७५ पुग्नेछ।
मर्जरपछि बन्ने नयाँ कम्पनीको सञ्चालक समिति अध्यक्षमा हिमालयन जनरल इस्योरेन्सतर्फबाट हुने सहमति भएको छ। तीन जना सञ्चालक हिमालयबाट र तीन जना एभरेष्ट बैंकबाट हुनेछन्। कम्पनीको प्रमुख कार्यकारी अधिकृतमा विजयबहादुर शाह हुनेछन्। शाह अहिले हिमालयन जनरल इन्स्योरेन्समा प्रमुख कार्यकारी अधिकृत छन्।
