बुधबार सेयर बजारमा कुल एक अर्ब ७३ करोडको कारोबार हुँदा शिवम् सिमेन्ट एउटैको १६ करोड ४२ लाखको सेयर खरिद-बिक्री भएको छ। यो कुल कारोबार रकमको १० प्रतिशत हो। कम्पनीले आकर्षक लाभांश दिने हल्ला चलेसँगै कारोबार बढिरहेको छ।
त्यस्तै, नेप्से परिसूचक गत आठ दिनदेखि निरन्तर बढिरहेको छ। बुधबार नेप्से ४.८९ अंकले बढेको हो। यस दिन नेप्से परिसूचक ०.२४ प्रतिशतले बढेर २०५०.५९ बिन्दुमा पुगेर बन्द भएको छ।
बुधबार कारोबारमा आएका २१५ वटा धितोपत्र तथा ऋणपत्रको एक अर्ब ७३ करोड १८ लाख ३२ हजार २७० रुपैयाँ बराबरको सेयर खरिद-बिक्री भएको छ।
मंगलबारको तुलनामा कारोबार रकम भने घटेको छ। मंगलबार दुई अर्ब २९ करोड ९३ लाख १६ हजार ३२६ रुपैयाँ बराबरको सेयर खरिद-बिक्री भएको थियो।
बुधबार मल्टिपर्पस फाइनान्सको सेयर मूल्य सर्वाधिक बढेको छ। कम्पनीको सेयर मूल्य अघिल्लो दिनको तुलनामा ५.६९ प्रतिशतले बढेर दुई सय ६० रुपैयाँमा कारोबार भएको छ। त्यस्तै, दोस्रोमा कर्णाली विकास बैंकको सेयर मूल्य ४.३५ प्रतितशले बढेर अन्तिम मूल्य दुई सय ४० रुपैयाँ कायम भएको छ।
बुधबार मूल्य सर्वाधिक घट्नेमा लक्ष्मी इक्विटी फण्ड रहेको छ। उक्त फण्डको इकाइ मूल्य ६.३३ प्रतिशतले घटेको हो। त्यस्तै, इमर्जिङ नेपालको सेयर मूल्य ४.३१ प्रतिशतले घटेर आठ सय रुपैयाँमा कारोबार भएको छ।
आज कारोबारमा आएका १३ वटा समूहगत परिसूचकमध्ये ५ वटा समूहको परिसूचक घटेको छ भने बाँकी ८ समूहको परिसूचक बढेको छ।
बुधबार वित्त, उत्पादन तथा प्रशोधन र अन्य समूहको परिसूचक १ प्रतिशतभन्दा धेरैले बढेको छ भने बैंकिङ, व्यापार, होटल्स तथा पर्यटन, जलविद्युत र जीवन बीमा समूहको परिसूचक घटेको छ।
